Qazaqstan BUU Qaýipsizdik Keńesinde kóp jaqtylyqty nyǵaıtýǵa shaqyrdy
Kópjaqty yntymaqtastyqtyń máselelerine arnalǵan otyrys 9 qarashada Qaýipsizdik Keńesinde osy aıda tóraǵalyq etetin Qytaıdyń bastamasy boıynsha ótti. Bıylǵy jyly jáne BUU Bas Assambleıasynyń 73-shi sessııasyndaǵy jalpy saıası pikirtalastarynyń barysynda eń basty taqyryp osy boldy.
Qazaqstan ókili, QR-nyń BUU janyndaǵy Turaqty ókiliniń orynbasary Qanat Tumysh óz sózinde Prezıdent Nursultan Nazarbaevtyń «Álem. XXI ǵasyr» manıfestin eske saldy. Onda Memleket basshysy álemniń kóshbasshylaryn álemdegi ádil ekonomıkalyq jáne áleýmettik tártipti ornatý úshin birlesip jumys isteýge, sondaı-aq BUU-nyń 100 jyldyǵyna oraı qaqtyǵystardy, terrorızmdi toqtatýǵa jáne jappaı qyryp-joıatyn qarýdy joıýǵa shaqyrdy.
«Sheshilmegen qaqtyǵystar, kópke sozylǵan soǵystar, terrorızm, ekstremızm, kedeıshilik, indet, zańsyz kóshi-qon jáne klımattyń ózgerýi sııaqty máseleler barlyq halyq úshin ortaq. Bul problemalardy óńirlik jáne jahandyq deńgeıdegi osaldyq, halyqaralyq quqyqtyq normalardyń erozııasy, ishki isterge aralasý, proksı-soǵystar men Jappaı qyryp-joıý qarýyn qoldaný qaýpi qıyndatyp otyr», - dep atap ótti Qazaqstan ókili.
Sonymen birge, ol halyqaralyq dárejede birge ómir súrýdi, atap aıtqanda, jahandyq basqarýdy, jalpy jaýapkershilikti jáne ujymdyq is-áreketterdi retteıtin qaǵıdattardy nyǵaıtýdyń mańyzdylyǵyn atap ótti.
Osy turǵyda osy jahandyq qubylysqa qarsy ymyrasyz kúresýdi qoldaýǵa nıettes BUU-nyń 70-ten asa múshe memleketiniń basyn bir koalıtsııaǵa biriktirgen Terrorızmnen azat álemge qol jetkizý tártibiniń kodeksin Qazaqstannyń bastamasymen iske qosý ataldy.
Sonymen qatar, Qazaqstan delegatsııasy BUU-nyń qaýipsizdik pen beıbitshilik máseleleri boıynsha bar alańdar men dıalogty nyǵaıtý úshin AÓSShK, ShYU, UQShU, IYU, EO, EQYU jáne taǵy basqa sııaqty halyqaralyq jáne óńirlik uıymdarmen jáne qurylymdarmen yntymaqtastyqty kúsheıtý qajettigin atap ótti.
Qazaqstannyń kópjaqtylyq úshin isjúzinde qosqan úlesine, ıaǵnı 120 joǵary bilikti bitimgershini BUU-nyń Lıvandaǵy Ýaqytsha kúshterine baǵyttaý úlgisine erekshe nazar aýdaryldy. «Biz qazaqstandyq bitimgershilik kontıngenti Qazaqstannyń BUU Qaýipsizdik Keńesindegi jumysy barysynda óristegenin maqtan tutamyz», - dedi Q. Tumysh.
BUU Bas hatshysy Antonıý Gýterrısh te óz sózinde bitimgershilikti halyqaralyq yntymaqtastyqtyń oń mysaly retinde erekshe atap ótti.
«Beıbitshilikti qoldaý operatsııalary kóptegen elderge qarýly qaqtyǵystarmen kúresýge kómektesti. Kóbinese bizdiń operatsııalar basty ról atqaryp, qantógisti jáne haosty toqtatýǵa múmkindik beredi», - dedi A. Gýterrısh.
151 memleket, onyń ishinde Qazaqstan jáne 4 jetekshi halyqaralyq uıym BUU aıasynda ázirlengen bitimgershilik salasyndaǵy is-áreketter josparyn qoldady. Sonymen qatar, BUU Qaýipsizdik Keńesiniń ashyq pikirtalastaryna BUU Bas Assambleıasy 73-shi sessııasy tóraǵasynyń mindetin atqarýshy Álııa Ál-Tanı, EKOSOS tóraǵasy Inga Kıng jáne BUU-nyń halyqaralyq qylmystyq sot tóraǵasy Ahmed ıÝsýf qatysty.
