Qazaqstan BUU-ǵa múshe barlyq elmen dıplomatııalyq qatynas ornatty
ASTANA. KAZINFORM – Qazaqstan Naoero Respýblıkasymen dıplomatııalyq qatynas ornatyp, Birikken Ulttar Uıymyna múshe barlyq memleketpen dıplomatııalyq baılanys ornatý úderisin aıaqtady, dep habarlaıdy Syrtqy ister mınıstrligi.
Qazaqstannyń BUU janyndaǵy turaqty ókili Qaırat Omarov pen Naoero Respýblıkasynyń BUU janyndaǵy turaqty ókili Lara Erab Danıel eki el arasynda dıplomatııalyq qatynastar ornatý týraly Birlesken kommıýnıkege qol qoıdy.
Naoero Qazaqstan dıplomatııalyq qatynas ornatqan álemdegi 195-shi memleket atandy. Osylaısha elimiz BUU-ǵa múshe barlyq memleketpen dıplomatııalyq baılanys ornatyp, otandyq dıplomatııa tarıhyndaǵy mańyzdy kezeńdi aıaqtady.
– Qujatqa qol qoıý BUU Jarǵysy men halyqaralyq quqyq qaǵıdattaryna, onyń ishinde memleketterdiń egemendigi men aýmaqtyq tutastyǵyn ózara qurmetteý, memleketterdiń teńdigi jáne bir-biriniń ishki isterine aralaspaý qaǵıdattaryna negizdelgen ekijaqty yntymaqtastyqty damytýǵa negiz qalady, – dep habarlady mınıstrlik.
Kezdesý barysynda taraptar saıası dıalogty, saýda-ekonomıkalyq jáne gýmanıtarlyq baılanystardy damytý múmkindikterin talqylady.
Saýda, ornyqty damý, tsıfrlandyrý jáne adamı kapıtaldy damytý ekijaqty yntymaqtastyqtyń perspektıvaly baǵyttary retinde ataldy.
Sondaı-aq BUU jáne basqa da halyqaralyq uıymdar aıasyndaǵy áriptestikti nyǵaıtýǵa erekshe nazar aýdaryldy.
Taraptar halyqaralyq kún tártibindegi ózekti máseleler boıynsha turaqty dıalog júrgizýdiń jáne Qazaqstan men Tynyq muhıty óńiri memleketteri arasyndaǵy yntymaqtastyqty keńeıtýdiń mańyzdylyǵyn atap ótti.
Syrtqy ister mınıstrliginiń málimetinshe, Naoeromen dıplomatııalyq qatynastyń ornatylýy Qazaqstannyń halyqaralyq baılanystardy keńeıtý jáne álem elderimen syndarly dıalogty damytý saıasatynyń jalǵasy sanalady.
Aıta keteıik, buǵan deıin Qazaqstan men Ońtústik Sýdan dıplomatııalyq qatynastar ornatqan edi. 2025 jylǵy 15 jeltoqsanda eki eldiń BUU janyndaǵy turaqty ókilderi birlesken kommıýnıkege qol qoıǵan. Ońtústik Sýdan Qazaqstan dıplomatııalyq baılanys ornatqan 191-shi memleket bolǵan.
