Qazaqstan BUU elektrondy úkimetti damytý ındeksinde 28-orynda tur

ASTANA. QazAqparat – Qazaqstanda 40 memlekettik qyzmet turǵyndarǵa proaktıvti formatta kórsetiledi. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

Onyń aıtýynsha, mınıstrliktiń jumysy myna strategııalyq baǵyttardy qamtıdy: memlekettik qyzmet kórsetýdi jetildirý, baılanys salasyn damytý jáne aqparattyq tehnologııalar men ınnovatsııalardy damytý, ǵarysh salasyn damytý.

«Azamattar úshin proaktıvti túrde adam qajettiligine baǵyttalǵan qyzmetterdi engizip jatyrmyz. Qazirgi tańda 40 memlekettik qyzmet proaktıvti formatta kórsetilýde, 15 memlekettik qyzmet – syrtqy platformalarǵa shyǵaryldy, 20 tsıfrlyq qujat 7,5 mln ret qoldanyldy», -dedi Baǵdat Mýsın mınıstrliktiń keńeıtilgen alqa otyrysynda.

Sonymen birge, vedomstvo basshysy BeıneHQO, tsıfrlyq qujattar jáne Egov mobıldi qosymshasynyń qoljetimdigi týraly baıandady.

«Búginde osy jobalardyń arqasynda bizdiń elimiz BUU elektrondy úkimettiń damýy ındeksi boıynsha 28-orynda tur jáne tsıfrlyq qyzmetter boıynsha sýbındekste – 8 oryndamyz», - dedi Tsıfrlyq damý mınıstri.

Aıta keteıik, elordada Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa otyrysy ótip jatyr, onda mınıstrlik jetekshilik etetin baǵyttardaǵy jumystyń qorytyndylary men basymdyqtary talqylanbaq.