Qazaqstan BUU elektrondy úkimetterinde 28 orynǵa taban tiredi – Alık Shpekbaev

ALMATY. QazAqparat – Qazaqstan BUU elderindegi elektrondy úkimetter reıtıngisinde 28-orynǵa taban tiredi. Bul eldegi memlekettik qyzmet kórsetý salasynda sybaılas jemqorlyqtyń joıylyp bara jatqanyn kórsetedi. Osyndaı oıymen Almatyda «Qazaqstandaǵy quqyq qorǵaý jáne sot júıesin jańǵyrtýdyń ózekti máseleleri» atty halyqaralyq dóńgelek ústel barysynda QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev bólisti, dep habarlaıdy QazAqparat tilshisi.

Halyqaralyq shara Qazaqstan Sarbonna ınstıtýtynda ótip jatyr.

Agenttik tóraǵasy memlekette sońǵy jyldary sybaılas jemqorlyqqa qarsy engizilgen birneshe is-qımyl paketteri jaıly aıtty.

Onyń aıtýynsha, birinshi paket boıynsha antıkorrýptsııalyq saraptama qalpyna keltirilgen. Osy salaǵa baılanysty qoǵamnyń tikeleı qatysýymen normatıvtik quqyqtyq aktiler qabyldandy.

Ekinshi pakette de asa mańyzdy sharalar qabyldanǵan.

«Atap aıtqanda, kvazımemlekettik sektordaǵy sybaılas jemqorlyqqa qarastyrylǵan jaýapkershilik kúsheıtildi. Týysqandardyń bir uıymda jumys isteýine shekteý qoıyldy. Syılyq alýǵa tyıym salyndy. Sonymen qatar, memlekettik qyzmetkerlerin, quqyq qorǵaý organdarynyń qyzmetkerlerin para alýǵa ıtermelegen adamdarǵa jaýapkershilik kúsheıtildi. Burynǵy eskirgen kúres tetikterin jasandy ıntellekt, blokcheın, bıgdata tehnologııalary almastyryp jatyr. Qazir tsırflandyrý aıasynda osy tehnologııalar engizilip jatyr. Qazaqstanda memlekettik qyzmetterdiń 90 paıyzy elektrondy formatqa aýystyrylǵan. ıAǵnı, biz tolyǵymen osy saladaǵy sybaılas jemqorlyqty joıdyq dese de bolady. Qazaqstan BUU elektrondy úkimetteri reıtınginde 28-orynǵa taban tiredi. Eger, eletkrondy formatta kórsetiletin memqyzmetterdiń úlesi 90 paıyzǵa jetse, bul elde sybaılas jemqorlyq joq dep sanaıdy», - dedi agenttik tóraǵasy.

Úshinshi pakette kórsetilgen sharalarǵa qatysty Memleket basshysy jaqynda jarlyqqa qol qoıdy.

«Ol aldyńǵy paketterge qaraǵanda sybaılas jemqorlyq úshin qarastyrylǵan jazany kúsheıtýge baǵyttalǵan. Áńgime memlekettik qyzmetshiler men depýtattardyń, sýdıalardyń sheteldik bankterde shotynyń bolýyna tyıym salyný týraly bolyp jatyr. Aýyr jáne asa aýyr korrýptsııalyq qylmysy úshin otyrǵan tulǵalar ýaqytynan buryn shartty túrde bosap shyǵa almaıdy», - dedi A.Shpekbaev.

Onyń aıtýynsha, kelesi jyly sybaılas jemqorlyqqaqarsy tórtinshi paket iske qosylmaq.

«Ol halyqaralyq tájirıbedegi úzdik standarttardy engizýge baǵyttalady. Atap aıtqanda, jarııa qylýshy tulǵalardy qorǵaý boıynsha keshendi sharalar, adamgershilik prıntsıpterine negizdelgen «ıntegrıtı chek» tekserý ınstıtýtyn qurý qolǵa alynady. Qazirgi tańda Qazaqstanda sybaılas jemqorlyqqa qarsy zańnama kúrdeli modernızatsııalyq kezeńnen ótip jatyr. Byltyr jyl sońynda biz Eýropa keńesi, GREKO elderiniń tolyqqandy 50-múshesi bolyp qabyldandyq», - dedi ol.