Qazaqstan BUU DB-men ary qaraı da jan-jaqty seriktestikti nyǵaıtýǵa daıar - G. Ábdiqalyqova

ASTANA. QazAqparat - BUU Damý baǵdarlamasymen yntymaqtastyq aıasynda 10 joba júzege asyrylýda. Bul týraly búgin Astana ekonomıkalyq forýmy aıasyndaǵy «BUUDB 50 jyldyǵy: Ornyqty damý maqsattaryna jetýdi jedeldetý úshin jańa múmkindikterdi zertteý» sessııasynda QR Memlekettik hatshysy Gúlshara Ábdiqalyqova málim etti.

«20 jyldan astam ýaqyt buryn Qazaqstan men BUU-nyń eldik komandasymen seriktestik qatynastar bastaldy. Respýblıkanyń Táýelsizdigin alǵan kezeńinen bastap el Prezıdenti Nursultan Nazarbaev Qazaqstandy álemniń eń qaýipsiz jáne ómir súrýge jaıly memleketke aınaldyrý basymdyqtaryn aıqyndady. Osy úderiste negizgi ról Qazaqstan men BUU arasyndaǵy strategııalyq yntymaqtastyqqa arnaldy. Ótken jyldarda ózara is-qımyldyń tıimdi júıesi túzilip, osy rette bizge 170-ten astam áleýmettik mańyzdaǵy jobalardy júzege asyrýǵa múmkindik ashyldy»,-dedi Memleket hatshy.

G. Ábdiqalyqovanyń sózine qaraǵanda, osy baǵyttaǵy yntymaqtastyqtyń arqasynda kedeıshilikti merziminen buryn qysqartýǵa, genderlik teńdikti alǵa jyljytýda tıisti ilgerileýshilikke qol jetkizildi.Memlekettik organdardyń, azamattyq qoǵamnyń jáne ózge seriktesterdiń kóp qyrly keshendi jumystarynyń nátıjesinde Qazaqstan básekege qabilettilik jahandyq reıtınginde jaqsy kórsetkishterdi baıqatty.

«Búginde BUU Damý baǵdarlamasymen yntymaqtastyq aıasynda 10 joba júzege asyrylýda. Olardyń ishindegi mańyzdylarynyń biri sot monıtorıngi júıesin jetildirý jobasy bolyp tabylady»,-dep atap ótti ol.

Ótken jyldar uıymmen birlese túrli salalarda aýqymdy jumystar atqarylǵanyn eske salyp ótken Memlekettik hatshy, «Aǵymdaǵy jáne perspektıvaly jobalar aıasynda bizdiń memleket BUUDB-men ary qaraı da jan-jaqty seriktestikti nyǵaıtýǵa daıar. Osy oraıda uıym tarapynan Qazaqstannyń bastamalaryna qoldaý jasalyp kele jatqanyn joǵary baǵalaımyz. Sóz sońynda Birikke Ulttar Uıymy Damý baǵdarlamasyn 50 jyldyǵymen shyn júrekten quttyqtaımyn! Qazaqstan árqashan sizdermen tabysty jumys isteýge daıyn dep sendirgim keledi»,-dep túıdi ol.