Qazaqstan BUU-da memlekettik qyzmetti tsıfrlandyrý tájirıbesin tanystyrdy
ASTANA. KAZINFORM — QR Memlekettik qyzmet isteri agenttiginiń tóraǵasy Darhan Jazyqbaı BUU-nyń JI-di basqarý jónindegi alǵashqy jahandyq dıalogy aıasynda ótken «Jasandy ıntellekt salasyndaǵy tsıfrlyq alshaqtyqty eńserý: áleýetti damytý, qoljetimdilik jáne tsıfrlyq negizder» atty sessııada sóz sóıledi. Bul týraly Kazinform agenttiginiń Jenevadaǵy menshikti tilshisi habarlady.
Darhan Jazyqbaı Qazaqstannyń memlekettik basqarý júıesi jasandy ıntellekt tehnologııalaryn tıimdi ári jaýapkershilikpen paıdalanýǵa daıyn ekenin málimdedi. Onyń aıtýynsha, azamattardyń jasandy ıntellektige degen senimi algorıtmderden emes, memlekettiń sheshimderdi ádil, ashyq ári esep berýshilik qaǵıdattaryna saı qabyldaıtynynan bastalady.
Mysal retinde ol Qazaqstannyń memlekettik qyzmetti tsıfrlyq transformatsııalaý nátıjelerin tanystyrdy.
— e-Qyzmet tsıfrlyq HR-platformasy 80 myńnan astam memlekettik qyzmetshini biriktirip, 400-den astam tsıfrlyq HR-protsesti qamtıdy. Platforma 100-den astam memlekettik aqparattyq júıemen ıntegratsııalanǵan. Memlekettik qyzmetke konkýrstyq irikteý tolyqtaı onlaın formatqa kóshirilip, nebári 5–7 jumys kúnin alady. Bul protsestiń ashyqtyǵyn, básekelestigin jáne obektıvtiligin qamtamasyz etedi, — dedi Darhan Jazyqbaı.
Onyń aıtýynsha, memlekettik basqarý salasynda Qazaqstan Integrity by Design qaǵıdatyn ustanady. Úmitkerlerdiń anonımdi derekterin, biryńǵaı baǵalaý júıesin, avtomattandyrylǵan reıtıngterdi paıdalaný jáne árbir sheshimniń sandyq izin saqtaý sýbektıvtilikti jáne sybaılas jemqorlyq táýekelderin azaıtýǵa kómektesedi.
Búginde Agenttik kadrlyq derekterdi taldaý úshin jasandy ıntellekt tehnologııalaryn qoldanady. Kadrlyq josparlaýdyń boljamdyq quraldaryn damytyp, memlekettik fýnktsııalarǵa aýdıt júrgizedi. Memlekettik sektorǵa jasandy ıntellektini engizý úsh qaǵıdatqa negizdelgen: qoljetimdilik, adam tarapynan baqylaý jáne esep berýshilik.
— Jasandy ıntellekt sheshim qabyldaýǵa kómektese alady, alaıda ol adamnyń jaýapkershiligin almastyrmaýy tıis. Túptep kelgende, másele tehnologııanyń memleketti ózgerte alýynda emes, memlekettiń bul tehnologııalarǵa qandaı qundylyqtardy engizetininde. Qazaqstan ashyqtyq pen teń múmkindikter qaǵıdattaryn ustanady jáne óz tájirıbesimen bólisýge daıyn, — dedi Darhan Jazyqbaı.
Qazaqstannyń memlekettik qyzmet salasyndaǵy tsıfrlyq HR-sheshimderi men tájirıbesi halyqaralyq deńgeıde moıyndalyp keledi.
Osyǵan deıin mınıstr Jaslan Mádıev BUU-ǵa múshe memleketterdi yntymaqtastyqqa shaqyryp, ulttyq sarapshylardy Ortalyq bazasynda jumys isteýge jiberýdi usyndy.
