Qazaqstan BUU belgilegen turaqty damý maqsattaryn qalaı iske asyryp jatyr
UEM basshysy atap ótkendeı, Qazaqstan TDM iske asyrýdyń ınstıtýtsıonaldyq bazasyn qalyptastyrýǵa jáne damytýǵa erekshe kóńil bóledi.
Elde memlekettik josparlaý júıesi turaqty damý maqsattarynyń 262 ulttyq ındıkatoryn eskere otyryp, iske asyp jatyr.
Mınıstrdiń aıtýynsha, QR Ortalyq Azııada eń alǵashqy bolyp damýdy qarjylandyrýdy baǵalaý boıynsha jumys júrgizdi.
Baǵalaý memlekettik bıýdjet turaqty damýdy qarjylandyrýdyń negizgi kózi bolyp qala beretinin kórsetti.
Sonymen qatar, jeke menshik sektor qarjylandyrýdy ulǵaıtý úshin úlken áleýetke ıe.
«TDM (Turaqty damý maqsattary) iske asyrý kezinde biz «eshkimdi artta qaldyrmaý» mańyzdy qaǵıdatyn basshylyqqa alyp otyrmyz. Árkimniń pikiri estilgen jón. El úshin basym TDM-dy talqylaýǵa jáne aıqyndaýǵa memlekettik bılik organdarynyń, azamattyq qoǵamnyń, qoǵamdyq birlestikterdiń, halyqaralyq uıymdardyń ókilderi, sondaı-aq jastar men halyqtyń basqa da toptary tartylady», - dedi Á.Qýantyrov.
Turaqty damý maqsattarynyń kelesi baǵyttary basym bolyp belgilendi: «kedeılikti joıý», «jaqsy densaýlyq jáne amandyq», «taza sý men sanıtarııa» jáne «laıyqty jumys pen ekonomıkalyq ósý».
Budan basqa, Qazaqstanda ekonomıkalyq ósimdi qalpyna keltirýdiń keshendi jospary iske asyryldy.
Qabyldanǵan sharalardyń nátıjesinde 2021 jyldyń qorytyndysy boıynsha ulttyq ekonomıkanyń JІÓ (jalpy ishki ónim) ósimi 4%-ǵa jetip, josparly qalpyna keldi.
«2022 jyldyń alǵashqy 6 aıynda elimizge ınvestıtsııa aǵyny ótken jyldyń sáıkes kezeńimen salystyrǵanda 2,6%-ǵa artty. Halyqaralyq rezerv 86,6 mlrd dollardy qurady», - dep naqtylady mınıstr.
Bul rette jasyl bastamalarǵa da erekshe kóńil bólinedi. Halyqaralyq standarttarǵa sáıkes keletin jańa Ekologııalyq kodeks qabyldandy.
Qalalarda sýmen jabdyqtaý obektilerine qoljetimdilik 98,1%-ǵa, aýyldyq jerlerde 93%-ǵa jetti.
«2060 jylǵa deıin kómirtegi beıtaraptyqa qol jetkizý strategııasy ázirlenip jatyr, ol qorshaǵan ortaǵa zalaldy aıtarlyqtaı tómendetýge múmkindik beredi. Turaqty damý qaǵıdattary ESG standarttary negizinde strategııalar men bıznes-modelderge birtindep eńgizilip jatyr», - dep habarlady UEM basshysy.
Qazaqstan óz aldyna 2025 jylǵa qaraı shıkizattyq emes eksporttyń úlesin 45,7% deńgeıinde qamtamasyz etý, eńbek ónimdiligin 20,6% arttyrý, balamaly jáne jańartylatyn energııa kózderin paıdalanýdy 2050 jylǵa qaraı 50% deıin ulǵaıtý jáne kómir tutynýdy birtindep azaıtý mindetterin qoıyp otyr.
