Qazaqstan BUU Bas hatshysy laýazymyna Lana Nýseıbeniń kandıdatýrasyn quptaıdy
ASTANA. KAZINFORM — Qazaqstan Birikken Arab Ámirlikteriniń memlekettik syrtqy ister mınıstri, BAÁ-niń BUU janyndaǵy burynǵy Turaqty ókili Lana Zakı Nýseıbeniń kandıdatýrasyn Birikken Ulttar Uıymynyń Bas hatshysy laýazymyna usynýyn quptaıdy jáne osy bastamany qoldaıtynyn bildiredi.
Beıbitshilik pen qaýipsizdikti qamtamasyz etý, ornyqty damý jáne adam quqyqtaryn qorǵaý isinde BUU tıimdiligin arttyrýǵa qatysty úmitterdiń ósýi jaǵdaıynda Birikken Ulttar Uıymy Bas hatshysynyń saılaýy halyqaralyq qoǵamdastyqtyń erekshe nazaryn aýdaryp otyr.
– Saılaý protsesi Qaýipsizdik Keńesinde konsensýsqa qol jetkizýdegi belgili bir qıyndyqtarmen qatar júrip otyr. Buny beıresmı daýys berýdiń aldyńǵy raýndtarynyń nátıjeleri kýálandyrýda. Osyǵan oraı Qazaqstan úmitkerler ortasynyń keńeıýin quptap, muny syndarly dıalogty jalǵastyrý jáne ózara qolaıly sheshim izdeý úshin qosymsha múmkindik retinde qarastyrady. Qazaqstan óz tarapynan halyqaralyq qatynastardaǵy BUU-nyń ortalyq rólin nyǵaıtýdy, onyń qyzmetiniń tıimdiligin arttyrýdy jáne jahandyq syn-qaterlerge den qoıýdyń kópjaqty tetikterin jetildirýdi dáıekti túrde jaqtaıdy, - delingen QR Syrtqy mınıstrligi habarlamasynda.
QR Syrtqy ister mınıstri Muhtar Tileýberdi bıylǵy qyrkúıekte BUU Bas Assambleıasynyń 81-sessııasynda sóılegen sózinde atap ótkendeı, kelesi Bas hatshyny saılaý sessııanyń aıqyndaýshy oqıǵalarynyń biri bolmaq. Qazaqstan BUU Jarǵysyna tolyq sáıkes keletin ashyq, ınklıýzıvti jáne kandıdattardyń kásibı eńbek úlesine negizdelgen irikteý protsesin jaqtaıdy.
BAÁ BUU Bas hatshysy qyzmetine óz úmitkerin usynǵanyn jazǵan edik.
