Qazaqstan BUU aıasynda Halyqaralyq sý uıymyn qurýdy kózdep otyr
ASTANA.KAZINFORM – QR Sý resýrstary jáne ırrıgatsııa mınıstri Nurjan Nurjigitov BUU-nyń Eýropalyq ekonomıkalyq komıssııasy atqarýshy hatshysynyń orynbasary Dmıtrıı Marıasınmen kezdesti.
Taraptar sý salasyndaǵy ekijaqty yntymaqtastyqtyń keleshegin jáne Memleket basshysy Qasym-Jomart Toqaevtyń BUU qurylymy aıasynda Halyqaralyq sý uıymyn qurý jónindegi bastamasyn talqylady.
Mınıstrdiń aıtýynsha, QR Prezıdentiniń bastamasy Astanada ótken Óńirlik ekologııalyq sammıt aıasyndaǵy konsýltatsııalarǵa qatysýshylar tarapynan oń qoldaý tapqan. Konsýltatsııalarǵa 30-dan astam memleket pen 20 halyqaralyq uıymnyń shamamen 140 ókili qatysty.
Qazirgi ýaqytta bıylǵy shilde aıynda Nıý-Iorkte ótetin BUU-nyń Turaqty damý jónindegi joǵary deńgeıli saıası forýmy alańynda halyqaralyq konsýltatsııalardyń ekinshi kezeńin ótkizý múmkindigi qarastyrylyp jatyr.
- Sý máselelerin sheshýdiń ornyqty tásilderin ilgeriletý jáne óńirlik yntymaqtastyqty nyǵaıtý baǵytynda Ortalyq Azııa elderine turaqty qoldaý kórsetip kele jatqan BUU Eýropalyq ekonomıkalyq komıssııasyna alǵysymyzdy bildiremiz. Qazaqstan EEK-pen áriptestikti joǵary baǵalaıdy jáne onyń qyzmetine qatysýdy eldiń sý qaýipsizdigin nyǵaıtýdyń mańyzdy tetigi retinde qarastyrady. Qazirgi tańda sý resýrstaryna qatysty syn-qaterlerdiń kúsheıýi jaǵdaıynda halyqaralyq ózara is-qımyldyń, saraptamalyq jáne ádistemelik qoldaýdyń mańyzy artyp keledi. Sonymen qatar sý salasyndaǵy halyqaralyq bastamalardy ilgeriletý úshin BUU Eýropalyq ekonomıkalyq komıssııasymen yntymaqtastyq áleýetin tıimdi paıdalanýǵa múddelimiz, - dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, osyǵan deıin Májilis depýtaty Ashat Raqymjanov Qazaqstannyń sý tapshylyǵy qaýpiniń aldynda turǵanyn aıtty.
