Qazaqstan BUU alańynda jasandy ıntellekt boıynsha óńirlik yntymaqtastyqty kúsheıtýdi usyndy
ASTANA. KAZINFORM — Jaslan Mádıev óz baıandamasynda BUU-ǵa múshe memleketterdi yntymaqtastyqqa shaqyryp, ulttyq sarapshylardy Ortalyq bazasynda jumys isteýge jiberýdi usyndy.
Jenevadaǵy «Tsıfrlyq aptalyq» aıasynda Qazaqstan Respýblıkasy Premer-Mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev «Inklıýzıvti jáne ózara úılesimdi tásilder negizinde jasandy ıntellekttiń artyqshylyqtaryn barlyǵynyń ıgiligi úshin paıdalaný» taqyrybyndaǵy Joǵary deńgeıdegi plenarlyq otyrysta sóz sóıledi. Ol Qazaqstannyń BUU reformalaryn qoldaıtynyn rastap, «tsıfrlyq ult» qurýdaǵy ulttyq tájirıbesimen bólisti.
Jaslan Mádıev Memleket basshysy Qasym-Jomart Toqaevtyń tapsyrmasy boıynsha Qazaqstan elektrondyq úkimet modelinen JI tehnologııalary memlekettik basqarý men ekonomıkanyń barlyq deńgeıine tereń ıntegratsııalanǵan AI-native nation mártebesine kóshýge múddeli ekenin atap ótti. Qazirgi tańda respýblıka BUU-nyń elektrondyq úkimetti damytý ındeksinde 24-orynda, memlekettik qyzmetterdiń 92%-y tsıfrlandyrylǵan, al Tsıfrlyq kodeks pen «Jasandy ıntellekt týraly» zańdy qamtıtyn zańnamalyq baza azamattardyń tsıfrlyq quqyqtaryn qorǵaýǵa kepildik beredi.
Dıalog barysynda Qazaqstannyń negizgi usynysy óńirlik yntymaqtastyqty kúsheıtý bastamasy boldy. Bıylǵy sáýirde BUU-nyń Azııa jáne Tynyq muhıty úshin ekonomıkalyq jáne áleýmettik komıssııasy Almatyda Turaqty damýǵa arnalǵan Azııa-Tynyq muhıty tsıfrlyq sheshimder ortalyǵyn qurýdy qoldady. Jaslan Mádıev óz baıandamasynda BUU-ǵa múshe memleketterdi yntymaqtastyqqa shaqyryp, ulttyq sarapshylardy Ortalyq bazasynda jumys isteýge jiberýdi usyndy. Qazaqstan tarapynyń pikirinshe, bul alań ozyq tsıfrlyq sheshimderdi synaqtan ótkizý jáne aýqymdaý úshin tıimdi «qumsalǵyshqa» aınalmaq. Bul BUU-nyń Ortalyq Azııaǵa arnalǵan Turaqty damý maqsattary jónindegi óńirlik ortalyǵymen sınergııada BUU-nyń 2030 jylǵa deıingi kún tártibin júzege asyrýdyń qýatty quraly bolmaq.
Jaslan Mádıev eldiń strategııalyq basymdyqtary retinde úsh baǵytty belgiledi: Qazaqstan Prezıdentiniń tóraǵalyǵymen Jasandy ıntellekt jónindegi keńes arqyly ınstıtýtsıonaldyq damý, ınfraqurylymdy keńeıtý (onyń ishinde 1 GVt qýattylyǵy bar Data Center Valley qurý jáne Transkaspıı talshyqty-optıkalyq magıstralin aıaqtaý) jáne AI-Sana bilim berý baǵdarlamalary men alem.ai halyqaralyq ortalyǵynyń qyzmeti arqyly adamı kapıtaldy damytý.
— Qazaqstan úshin JI-di ınklıýzıvti basqarý tájirıbelik ózara úılesimdilikti bildiredi. Biz yntymaqtastyqqa ashyqpyz, tájirıbe bólisýge, birlesken pılottyq jobalardy iske qosýǵa jáne tehnologııalardy retteýdiń úılesimdi tásilderin damytýǵa daıynbyz, — dep atap ótti Jaslan Mádıev.
Ol eldiń basty maqsaty — jasandy ıntellekttiń turaqty ekonomıkalyq damýǵa jáne azamattardyń ál-aýqatyn arttyrýǵa ólshenetin úles qosýyn qamtamasyz etý ekenin de aıtty.
Aıta ketelik Qazaqstanda HEO Akseleratsııa ortalyǵy qurylady.
