Qazaqstan BUU alańynda volonterlikti damytýdyń úzdik tájirıbelerin tanystyrdy
ASTANA. KAZINFORM – Qazaqstan Respýblıkasynyń Prezıdenti Qasym-Jomart Toqaevtyń bastamasymen jarııalanǵan Halyqaralyq volonterler jyly aıasynda Nıý-Iorktegi Birikken Ulttar Uıymynyń shtab-páterinde volonterlik boıynsha halyqaralyq yntymaqtastyqty damytýǵa baǵyttalǵan birqatar is-shara ótti.
Іs-sharalar Qazaqstan Respýblıkasynyń bastamasymen ótip, oǵan AÓSShK-ǵa tóraǵalyq etýshi Ázerbaıjan, AÓSShK Hatshylyǵy jáne BUU-nyń Volonterler baǵdarlamasy (UNV) qoldaý kórsetti.
Baǵdarlama aıasynda «AÓSShK-ǵa múshe memleketterdegi volonterlik» atty fotokórme ashylyp, «AÓSShK-ǵa múshe memleketterdegi volonterliktiń úzdik tájirıbeleri» taqyrybynda halyqaralyq paneldik pikirtalas ótti. Sondaı-aq AÓSShK elderinde volonterler qozǵalysyn damytý tájirıbesine arnalǵan elektrondy jınaq tanystyryldy.
Pikirtalas barysynda Qazaqstannyń volonterlik qozǵalysty damytý baǵytyndaǵy tájirıbesi sóz boldy. BUU ókilderi elimizde volonterler qyzmetin esepke alýdyń ulttyq júıesine jáne volonterlik mádenıetti damytýǵa baǵyttalǵan memlekettik bastamalarǵa joǵary baǵa berdi.
Іs-sharalarǵa BUU ókilderi, AÓSShK-ǵa múshe memleketterdiń delegatsııalary men halyqaralyq sarapshylar qatysty. Olar volonterlikti damytý, jastardyń qoǵamdaǵy belsendiligin arttyrý jáne osy saladaǵy halyqaralyq yntymaqtastyqty nyǵaıtý jónindegi úzdik tájirıbelerin ortaǵa saldy.
BUU shtab-páterinde ótken bul is-sharalar Qazaqstannyń halyqaralyq volonterlik bastamalardy ilgeriletýdegi mańyzdy rólin aıshyqtady.
Aıta ketelik Dastan Sátpaev pen ByDastann Halyqaralyq volonterler jylynyń jahandyq ambassadorlary atanǵan edi.
