Qazaqstan BUU alańynda volonterlikti damytý tájirıbesin tanystyrdy
ASTANA. KAZINFORM — Qazaqstan Germanııadaǵy BUU Volonterler baǵdarlamasynyń shtab-páterinde volonterlikti damytýdaǵy bastamalaryn tanystyrdy.
Bonn qalasynda Birikken Ulttar Uıymynyń Volonterler baǵdarlamasy aıasynda Azııa elderi seriktesteriniń dóńgelek ústeli ótti. Іs-sharaǵa óńir memleketteriniń ókilderi, halyqaralyq uıymdar men sarapshylar qaýymdastyǵy jınaldy.
Dóńgelek ústelge Qazaqstan Respýblıkasynyń delegatsııasy da qatysyp, elde júzege asyrylyp jatqan volonterlik qozǵalysty qoldaý sharalaryn tanystyrdy. Sonymen qatar Memleket basshysy Qasym-Jomart Toqaevtyń bastamasymen jarııalanǵan Turaqty damý maqsatyndaǵy Halyqaralyq volonterler jyly aıasyndaǵy jobalar týraly aıtyldy.
Jıyn barysynda volonterlik qozǵalysty damytý, azamattardy qoǵamdyq bastamalarǵa keńinen tartý jáne qoǵamdaǵy jaýapkershilik mádenıetin qalyptastyrý máseleleri keńinen sóz boldy. Qatysýshylar Qazaqstannyń bul baǵyttaǵy tájirıbesin joǵary baǵalap, eldiń volonterlikti damytý isinde aldyńǵy qatarda kele jatqanyn atap ótti.
Kezdesýde Qazaqstan Volonterliktiń jahandyq ındeksin engizýge qatysatyn pılot elderdiń biri bolatyny aıtyldy. Bul bastama volonterlik qyzmettiń qoǵam damýyna qosqan úlesin jan-jaqty baǵalaýǵa múmkindik berip, halyqaralyq yntymaqtastyqty odan ári nyǵaıtýǵa yqpal etedi.
Aıta ketelik Ortalyq Azııa elderi ekologııalyq volonterlikti damytý jóninde rezolıýtsııa qabyldaǵan edi.
