Qazaqstan BUU Adam quqyqtary jónindegi keńestiń músheligine ótinish bildirdi

ASTANA. QazAqparat - Astanada BUU Bas Assambleıasynyń Adam quqyqtary jónindegi jalpyǵa birdeı deklaratsııasynyń 70 jyldyǵyna arnalǵan jıyn ótti. Basqosýda QR Syrtqy ister mınıstri Qaırat Ábdiraxmanov shetel dıplomattaryn Qazaqstannyń taǵy bir bastamasyn qoldaýǵa úndedi, dep xabarlaıdy QazAqparat tilshisi.

«Búgin men osy jerde otyrǵan barlyq dıplomattarǵa xabarlandyrý jasaıyn dep edim. Qazaqstan 2022 jylǵa BUU Adam quqyqtary jónindegi keńestiń músheligine óz ótinishin bildirdi. 2013-2015 jyldary biz atalǵan qurylymnyń músheligin atqaryp shyqqan bolatynbyz. Endi, osy mańyzdy jumysty ary qaraı jalǵastyrýdy kózdeımiz. Osyǵan oraı, sizderdi Qazaqstannyń kandıdatýrasyn qoldaıdy degen úmittemiz», - dedi Q.Ábdiraxmanov Astanadaǵy dóńgelek ústelde. 

Mınıstr búgingi jıynnyń mańyzdylyǵyn da erekshe atap ótti. Onyń aıtýynsha, BUU Bas Assambleıasynyń Adam quqyqtary jónindegi jalpyǵa birdeı deklaratsııasy II Dúnıejúzilik soǵystan keıin ázirlengen bolatyn. Deklaratsııa avtorlary adam quqyqtaryn qorǵaýdyń jahandyq júıesin qurýdy kózdedi.

«Bul deklaratsııa adam quqyqtaryn qorǵaý salasyndaǵy ondaǵan xalyqaralyq qujattardyń qabyldaýyna yqpal etti. Sonymen qatar, deklaratsııa óziniń ózektiligin joǵaltpaı, osy kúnge deıin búkil álemdik qaýymdastyq úshin adam quqyqtaryn jalpyǵa birdeı nusqaýlyǵy bolyp tabylady. Atalǵan qujat 500-den astam tilge jáne dıalektige aýdarylǵan. Álemge kóp taraǵan qujat bolyp sanalady», - dep atap kórsetti Q.Ábdiraxmanov. 

Aıta keteıik, basqosýǵa QR Memlekettik xatshysy Gúlshara Ábdiqalyqova da qatysty. Al QR Joǵarǵy sot tóraǵasy Jaqyp Asanov sýdıa qyzmetine kásibı zańgerlerdi kóptep tartýǵa múddeli ekenin aıtty.