Qazaqstan buryn óndirmegen ónimderdi eksporttaı bastady
ASTANA. QazAqparat -Qazaqstannyń eksporttyq tasymalynyń geografııasy 122 eldi qamtydy. Bul týraly Úkimettiń keńeıtilgen otyrysynda QR Premer-Mınıstri Baqytjan Saǵyntaev aıtty, dep habarlaıdy «QazAqparat» HAA tilshisi.
Indýstrııalyq-ınnovatsııalyq damýdyń memlekettik baǵdarlamasyna keńirek toqtalǵan Úkimet basshysy 2010 jyldan beri Qazaqstanda quny 6 trln teńgeniń 1148 jańa jobasy iske asyrylǵanyn atap ótti. Osy jobalardyń arqasynda elimizde turaqty túrde 107 myń jumys orny ashylǵan.
«Qazaqstan buryn óndirmegen joǵary tehnologııaly ónimderdi eksportqa shyǵara bastady. Atap aıtqanda, lokomotıvter, elektrovozdar, jolaýshylar vagondary, avtokólikter, taý-ken jáne munaı óndirý qurylǵylary eksporttalýda. Farmatsevtıka, avtokólik qurastyrý, kólik elektrotehnıkasy, hımııa ónerkásibi men azyq-túlik óndirýde aıtarlyqtaı nátıjege qol jetkizilip otyr», - dedi Baqytjan Saǵyntaev.
Premer-Mınıstrdiń aıtýynsha, sonyń nátıjesinde ónerkásiptegi óńdeý sektoryna salym 31 paıyzdan (2010 jyly) 40 paıyzǵa (2017 jyly) artqan.
«Eńbek ónimdiligi ósti. Árbir jumysshy orta eseppen 10 myń AQSh dollarynyń ónimin óndiretin boldy. 2017 jyly óndeý ónerkásibiniń ósim qarqyny bes jyldyń maksımýmyna - 5,1 paıyzǵa jetti. Shıkizattyq emes taýarlardyń eksporty 22 paıyzǵa artyp, tasymaldaý geografııasy 122 eldi qamtydy. Qazaqstan qazirgi tańda óndeý sektory boıynsha 800 túrli taýar óndiredi», - dedi Úkimet basshysy óz baıandamasynda.
