Qazaqstan Búkilálemdik ekonomıkalyq forýmnyń reıtingisi boıynsha óz pozıtsııasyn 21 satyǵa kóterdi
ASTANA. 5 qyrkúıek. QazAqparat - Qazaqstan Búkilálemdik ekonomıkalyq forým ótkizetin jyl saıynǵy Básekege qabilettiliktiń jahandyq reıtıngisinde álemdegi 144 eldiń arasynda 51-orynǵa ıe boldy.
Ótken jylmen salystyrǵanda atalǵan reıtıngtegi Qazaqstannyń pozıtsııasy 21 pýnktige kóterildi, dep habarlady pm.kz saıty.
Usynylǵan esepke qaraǵanda, 2011-2012 jyldary Qazaqstan BEF reıtıngisinde 72 orynda bolǵan. Endi, bir jyl ishinde ulttyq ekonomıkanyń reıtıngisi 21 pozıtsııaǵa kóterilip, 51 orynǵa ıe boldy.
«Qazaqstan birneshe jyl buryn ıelengen 51 orynǵa qaıtyp oraldy. Bul progress birneshe saladaǵy jaǵdaıdyń ońalýymen túsindiriledi. Eldiń basty artyqshylyǵy - makroekonomıkalyq turaqtylyǵynda, bul kórsetkish boıynsha el 16 orynda tur. Budan basqa, tehnologııalyq daıyndyq boıynsha 87 qatardan 55-ke deıin kóterilgen. Alaıda, edáýir alǵa jyljýshylyqqa qaramastan, eldiń áli de densaýlyq saqtaý men bastaýysh bilim berý (99-oryn), bıznesti damytý (103-oryn) boıynsha biraz máselelerdi sheshýi qajet», - delingen BEF esebinde.
TMD elderi arasynda básekege qabylettilik ındeksi boıynsha Ázirbaıjan - 46 orynda, Reseı Federatsııasy - 67 orynda, Ýkraına - 73 orynda, Tájikstan - 100 orynda, Qyrǵyzstan - 127 orynda tur.
Sonymen qatar, anaǵurlym básekege qabyletti ekonomıkalardyń ondyǵyna kirgen Shveıtsarııa - 1 orynda, Sıngapýr - 2 orynda, Fınlıandııa - 3 orynda, Shvetsııa - 4 orynda, Nıderlandy - 5 orynda, Germanııa - 6 orynda, AQSh - 7 orynda,Ulybrıtanııa - 8 orynda. Gonkong - 9 orynda jáne Japonııa - 10 orynda tur.
Jahandyq básekege qabylettilik ındeksi (The Global Competitiveness Index) - bul jahandyq zertteý jáne ulttyq ekonomıkanyń básekege qabylettiligi kórsetkishi boıynsha álem elderiniń reıtıngisi. Atalǵan reıtıngti Búkilálemdik ekonomıkalyq forýmnyń taldaýshylary jyl saıyn ótkizedi.
