Qazaqstan búkil dári-dármektiń 90 paıyzyn shetten tasymaldaıdy - N. Nazarbaev
Y. Qarashanyń 13-i. QazAqparat /Ádilet Musahaev/ - Uzaq merzimdi perspektıvada, memleket 2014 jylǵa qaraı ishki qajettilikti 50 paıyzdyq otandyq dári-dármektermen qamtamasyz etýdi josparlaýda, ol úshin barlyq múmkindikter bar.
Elbasy Astanada tikeleı efır arqyly almatylyq Sergeı Frolovtyń, «qazaqstandyq tıimdi baǵadaǵy dáriler qashan paıda bolady», degen suraǵyna jaýap bere otyryp, osylaı málim etti, dep habarlaıdy QazAqparat.
Prezıdent munyń óte kókeıkesti suraq ekenin atap ótti. «Qazaqstan búkil dári-dármektiń 90 paıyzyn, 900 mıllıon AQSh dollaryna shetten tasymaldaıdy», dedi Elbasy.
Sondaı-aq Memleket basshysy QR Densaýlyq saqtaý mınıstrligi Qazaqstannyń mańyzdy otyz jobasyna kiretin arnaıy logıstıkalyq ortalyq qurýmen belsene shuǵyldanyp jatqandyǵyn jetkizdi. «Bul birinshiden, tártipke jáne baǵanyń tómendeýine ákeledi», dedi Prezıdent.
N.Nazarbaev sonymen birge, Astana men Shymkenttegi otandyq dári-dármekterdi shyǵaratyn farmatsevtıkalyq fabrıkanyń qurylysy tóńiregindegi suraq jaıynda da sóz qozǵady.
«Árıne, satyp alýǵa týra keletin preparattar bar. Biraq olardyń sapasyna baqylaý bolýy kerek. Memleket bul týraly biledi jáne máseleniń sheshimin qadaǵalaıdy», dedi Elbasy.
