Qazaqstan búginde adam kapıtalyn damytýda kósh bastap otyrǵan elderdiń biri - Premer-Mınıstrdiń orynbasary
TANA. 6 qyrkúıek. QazAqparat /Aıdar Ospanalıev/ - Qazaqstan búginde adam kapıtalyn damytýda kósh bastap otyrǵan elderdiń biri. Adam damýynyń ındeksi kórsetkishi 2010 jyly elimizde 0,7 paıyzǵa jetti. Bul adam áleýeti óte zor qarqynmen damyp otyrǵan elderge tán kórsetkish.
Bul týraly búgin «Táýelsizdikke 20 jyl: Qazaqstan Respýblıkasyndaǵy adam kapıtalyn damytýdyń sapasy men bolashaǵy» atty halyqaralyq konferentsııa barysynda Premer-Mınıstrdiń orynbasary Erbol Orynbaev málim etti.
Onyń sózine qaraǵanda, Qazaqstan osy kórsetkishtiń arqasynda álem boıynsha adam kapıtalyn damytý jóninen 169 eldiń arasynda 66-shy orynda tur. 1990 jyldan beri 2010 jylǵa deıin adam damýynyń ındeksi elimizde ortasha eseppen alǵanda 10 paıyzǵa artty nemese bul ósim jylyna 0,5 paıyzǵa kóbeıip otyrdy. «Bul óte jaqsy jetistik. AQSh-tyń qoǵamdyq-saıası basylymy «Newsweak» jýrnalynyń baǵalaýynsha, Qazaqstan bilim deńgeıi boıynsha álemde 14-shi orynda tur. Al kiris deńgeıi ortasha elderdiń arasynda Qazaqstan kósh bastap otyr. Sondaı-aq kiris deńgeıi ortashadan joǵary elderdiń arasynda aldyńǵy qatarda turǵan memleket Ońtústik Koreıa. Kirisi joǵary memleketterdiń arasynda Japonııa birinshi orynda tur»,-dedi Úkimet basshysynyń orynbasary.
Onyń aıtýynsha, adam kapıtalyn damytý men bul máseleniń mańyzdylyǵy Qazaqstannyń 2020 jylǵa deıingi strategııalyq damý josparynda kórsetilgen. Bul másele atalmysh josparda bolashaqqa salynǵan ınvestıtsııa retinde qarastyrylyp otyr. «Bul «Qazaqstan 2020» baǵdarlamasynyń júregi deýge bolady. Sonymen qatar adam kapıtaly atalmysh baǵdarlamada ınnovatsııa men ekonomıkanyń tıimdiligin arttyrýdyń jáne turǵyndardyń ál-aýqatyn arttyrýdyń basty qozǵaýshy kúshi retinde qarastyrylady»,-dedi E.Orynbaev.
