Qazaqstan budan bylaı shetelde el múddesin qorǵaýǵa otandyq zańgerlerdi tartady
ASTANA. KAZINFORM — QR Ádilet mınıstrligi shetelderde Qazaqstannyń múddesin qorǵaýǵa otandyq zańgerlik kompanııalardy tartýdy josparlap otyr.
Ádilet mınıstrliginde Azamat Esqaraevtyń tóraǵalyǵymen Qazaqstan Úkimetiniń múddelerin shetelde bildirý jáne qorǵaý máselelerine arnalǵan tuńǵysh halyqaralyq praktıkalyq konferentsııa ótti.
Vedmstvo basshysy Azamat Esqaraev Ádilet mınıstrligi sheteldik tórelikterde, memlekettik jáne sot organdarynda memlekettiń múddelerin qorǵaýdy jáne bildirýdi qamtamasyz etýge jaýapty organ bolǵandyqtan, bıýdjet qarajatyn tıimdi paıdalaný týraly Prezıdent belgilegen baǵytty nátıjeli túrde júzege asyratynyn atap ótti.
Aıta keteıik, bul másele Qazaqstan táýelsizdik alǵaly beri tuńǵysh ret kóterilip otyr.
Ádilet mınıstrliginiń bastamasymen ótkizilgen konferentsııaǵa qazaqstandyq zań qoǵamdastyǵynyń, birqatar memlekettik organdar men kvazımemlekettik sektor uıymdarynyń nazaryn ózine aýdaryp, túıtkildi máselelerdi talqylaýǵa túrtki boldy.
Konferentsııada spıker retinde Latham & Watkins; Sayat Zholshy & Partners; Tukulov, Kassilgov, Shaikenov Disputes; Curtis, Mallet-Prevost, Colt & Mosle, White & Case syndy jetekshi halyqaralyq jáne qazaqstandyq zań fırmalarynyń ókilderi sóz sóıledi.
Konferentsııada kóterilgen máselelerdiń negizgi bóligi atalǵan taqyryp boıynsha qazaqstandyq zań fırmalarynyń áleýetin paıdalaný múmkindikterin talqylaýǵa baǵyttaldy.
Jıynda barlyq qatysýshylarǵa óz bastamalaryn tanystyrýǵa múmkindik berildi.
Sondaı-aq spıkerler Ádilet mınıstrliginiń ókilderine ózderin qyzyqtyrǵan suraqtaryn qoıyp, mazmundy jaýaptar alýǵa múmkindik týdy.
Konferentsııaǵa qatysýshylar is-shara uıymdastyrýshylaryna alǵystaryn bildirip, kóterilgen máselelerdiń ózektiligi men der kezinde kóterilip otyrǵandyǵyn aıtyp, osy máselege óz úlesterin qosýǵa daıyn ekendigin jetkizdi.
Aıta ketý kerek konferentsııada aıtylǵan maqsat-mindetterdi iske asyrý, memleket múddelerin qorǵaýǵa qabiletti ulttyq kadrlar korpýsyn qalyptastyrýǵa negiz bolmaq.
Oǵan qosa, osy iske otandyq zań fırmalaryn tartý salyq tóleýshilerdiń qarajatynyń Qazaqstan ekonomıkasynda qyzmet etýine septigin tıgizbek.
Atalǵan konferentsııany jyl saıyn ótkizý josparlanyp otyr.
