Qazaqstan Brıýsselde Transkaspıı baǵytynyń strategııalyq áleýetin tanystyrdy
ASTANA. KAZINFORM — Belgııa astanasynda «Qazaqstan temir joly» UK» AQ uıymdastyrǵan Qazaqstan Respýblıkasy Úkimeti men QR-nyń Belgııa Koroldigindegi Elshiliginiń qoldaýymen «Qazaqstan men EO baılanysyn nyǵaıtý: Transkaspıı halyqaralyq kólik baǵdarynyń (THKB) perspektıvalary men strategııalyq áleýeti» atty Halyqaralyq bıznes-konferentsııa ótip jatyr. Bul týraly «Qazaqstan temir joly» UK» AQ baspasóz qyzmeti málim etti.
Іs-shara Qazaqstan men Eýropalyq Odaq elderinen 100 astam joǵary dárejeli qatysýshylardy biriktirdi.
Olardyń ishinde: Eýropalyq parlament depýtattary; Eýropalyq komıssııa ókilderi; Qazaqstan Respýblıkasy Prezıdenti Ákimshiliginiń jáne Úkimetiniń basshylary; «Qazaqstan temir joly» UK» AQ basshylyǵy; halyqaralyq qarjy ınstıtýttarynyń (EQDB, EIB) ókilderi; iri kóliktik-logıstıkalyq kompanııalar, júk ıeleri jáne salalyq qaýymdastyqtar.
— Konferentsııada QR Prezıdenti Ákimshiliginiń, QR Úkimetiniń, Eýropalyq parlamenttiń, QTJ basshylyǵynyń ókilderi, sondaı-aq DHL Global Forwarding, Alstom, DB Cargo, HHLA International, RHENUS, Hellmann Worldwide Logistics, Ahlers Logistics jáne A.P. Moller — Maersk sııaqty EO jetekshi logıstıkalyq korporatsııalarynyń top-menedjmenti negizgi baıandamalar jasady, — delingen habarlamada.
Konferentsııa Qazaqstan Respýblıkasynyń Prezıdenti Qasym-Jomart Toqaevtyń Eýropalyq Keńes Prezıdentiniń shaqyrýymen Belgııa Koroldigine resmı sapary aıasynda ótip jatyr.
Bul alań joǵary deńgeıdegi strategııalyq dıalogtyń praktıkalyq jalǵasy bolyp tabylady. Memleket basshysynyń sapary aıasynda Eýropalyq Keńes Prezıdenti Antonıo Koshtamen; Eýropalyq komıssııa Prezıdenti Ýrsýla fon der Lıaıenmen; Belgııa Premer-Mınıstri Bart de Vevermen mańyzdy kelissózder josparlanǵan.
— Qatysýshylar nazarynda Orta dálizdi damytýdyń strategııalyq máseleleri, onyń ishinde THKB-nyń ótkizý qabiletin arttyrý; temirjol, port jáne termınaldyq ınfraqurylymdy jańǵyrtý; logıstıkalyq protsesterdi tsıfrlandyrý; eýrazııalyq keńistikte turaqty jetkizý tizbegin qalyptastyrý jáne basqalar bar, — dep habarlady «Qazaqstan temir joly» UK» AQ baspasóz qyzmetinen.
Pikirtalas barysynda Orta dálizdi Eýropalyq Odaqtyń Global Gateway jahandyq bastamasymen ıntegratsııalaýǵa, sondaı-aq Eýropa men Ortalyq Azııa arasyndaǵy kólik jáne tsıfrlyq baılanysty keńeıtýge erekshe nazar aýdarylady.
Delegattardyń joǵary mártebesi jáne QR Prezıdentiniń kún tártibimen sınergııa Eýrazııa men EO arasyndaǵy negizgi tranzıttik-logıstıkalyq hab mártebesin Qazaqstanǵa bekite otyryp, Eýropalyq ınstıtýttardyń, halyqaralyq qarjy uıymdary men bıznestiń orta dálizdi damytýǵa ósip kele jatqan qyzyǵýshylyǵyn rastaıdy.
Eýropalyq keńes — bul EO elderiniń memleket jáne úkimet basshylary kiretin organ. Ol Eýropalyq odaq damýynyń negizgi saıası baǵyttary men strategııalyq basymdyqtaryn anyqtaıdy, biraq ádette zańdar qabyldamaıdy. Eýropalyq komıssııa — EO-nyń atqarýshy organy. Ol zań jobalaryn ázirleıdi, Eýropalyq Odaq zańdarynyń oryndalýyn qadaǵalaıdy, EO bıýdjetin basqarady jáne jekelegen elderdiń ornyna búkil odaqtyń múddelerin bildiredi.
Aıta keteıik, Qazaqstan temir jolynda LTE-R negizindegi biryńǵaı tsıfrlyq júıe qurylady.
