«Qazaqstan – birlik mekeni»: Elordada etnostar festıvali uıymdastyryldy
ASTANA. KAZINFORM – Elorda tórindegi Dostyq úıinde Qazaqstan halqynyń birligi kúnine arnalǵan «Qazaqstan – birlik mekeni» atty ulttyq mádenıet festıvali ótti.
Merekelik is-shara qonaqtardy erekshe kóńil-kúıge bóledi. Ulttyq kıimder, áýezdi án, dámdi taǵamdardyń ıisi merekege jınalǵandardy beı-jaı qaldyrmaǵan edi.
Festıval alǵash ret elordadaǵy 20-dan astam etnos ortalyqtarynyń basyn qosty. Olardyń árqaısysy óz mádenıetin ulttyq taǵamdar men qolóner buıymdary arqyly tanystyrýǵa tyrysty.
Sharany uıymdastyrýshy Záýre Ospanovanyń aıtýynsha, bul festıval elimizdegi kópultty birliktiń sımvolıkalyq kórinisine aınaldy.
– Qazaqstan – kópultty memleket, munda túrli halyqtardyń ókilderi beıbitshilik pen dostyqta ómir súrip jatyr. Birlik kúninde osy dostyq pen yntymaqty pash etip, jurtshylyqqa mereke syılaǵymyz keldi. Munda ulttyq kıim kıgen jandar óte kóp, ánder shyrqalyp, qoıylymdar ótip jatyr — osynyń bári birligimizdi taǵy bir márte aıshyqtaıdy, – dedi Záýre Ospanova.
Sahna tórinde etnomádenı birlestikterdiń kontserttik nómirleri birinen soń biri jalǵasty. Bıler, ánder men ult aspaptarynyń súıemeldeýindegi týyndylar merekelik rýhty asqaqtatyp, ár mádenıettiń ózindik ereksheligin ortaq birlik yrǵaǵymen ushtastyrdy.
Kelgen qonaqtar ulttyq taǵamdardan dám tatyp, túrli etnostardyń salt-dástúri men ádet-ǵurpymen jaqyn tanysýǵa múmkindik aldy.
Balaly otbasylar úshin ınteraktıvti alańdar men oıyn-saýyq baǵdarlamalary uıymdastyryldy. Sondaı-aq kishkentaı qatysýshylar arasynda úzdik ulttyq kıim baıqaýy ótti. Balalar óz ulttarynyń kıimin maqtanyshpen kıip shyǵyp, merekelik alańdy etnıkalyq ártúrliliktiń jarqyn galereıasyna aınaldyrdy.
Bul festıval Qazaqstan halqynyń birligi men ózara qurmet ıdeıasyn taǵy bir ret aıqyndaı tústi.
Aıta keteıik, buǵan deıin Astanada «Dala.Camp» ulttyq mal sharýashylyǵy ekspedıtsııasy bastalǵanyn jazǵan bolatynbyz.
