Qazaqstan birqatar elge bıdaı jetkizý boıynsha kelissózderdi jalǵastyryp jatyr
ASTANA. KAZINFORM – Ózbekstan, QHR, Ázerbaıjan, Iran jáne basqa da elderge Qazaqstannan sapasy tómen bıdaıdy jetkizý boıynsha kelissózder jalǵasyp jatyr.
«Qazaqstan bıdaıyn dástúrli túrde ımporttaýshylar qataryna Ortalyq Azııa elderi (Ózbekstan, Tájikstan, Túrkimenstan) jáne Aýǵanstan kirip otyr. Bul rette, 2022/2023 marketıngtik jyly sońǵy on jyldaǵy astyq ekvıvalentindegi bıdaı men unnyń rekordtyq kólemi eksporttaldy - 10 mln tonna. Onyń ishinde Ortalyq Azııa elderine - 5,8 mln tonna (Ózbekstan - 4,3 mln tonna, Tájikstan - 1,1 mln tonna, Túrikmenstan - 0,4 mln tonna), Aýǵanstanǵa - 2,6 mln tonna, QHR-ǵa - 369,4 myń tonna, Ázerbaıjanǵa - 277,1 myń tonna, Iranǵa - 1717,7 myń tonna jáne basqa elderge - 642 myń tonna eksporttaldy», - delingen Aýyl sharýashylyǵy mınıstrliginiń Kazinform agenttigine bergen jaýabynda.
Byltyr jaýyn-shashynnyń azdyǵyna baılanysty sharýalar úshin óte kúrdeli boldy. Ulttyq statıstıka bıýrosynyń málimetinshe, 2023 jyldyń qorytyndysy boıynsha 17 mln tonna astyq jınaldy (2022 jyly - 22 mln tonna), onyń ishinde 12,1 mln tonna bıdaı bastyryldy. 2022 jyly 16,4 mln tonna bıdaı jınalǵan edi. Bul rette, 2023 jylǵy eginniń edáýir bóligi klastyq emes bıdaıǵa jatady.
«Bul faktorlar osy jyldyń eksporttyq áleýetine áser etpeı qoımaıdy. Bul rette, 2024 jylǵy 24 aqpandaǵy jaǵdaı boıynsha marketıngtik maýsymnyń basynan (2023/24 j.) astyq ekvıvalentindegi bıdaı men un eksportynyń kólemi ótken jyldyń deńgeıinde qalyp otyr, eksport kólemi shamamen 6 mln tonnany qurady. Onyń ishinde Orta Azııa elderine - 3,6 mln tonna (Ózbekstan - 2,4 mln tonna, Tájikstan - 0,8 mln tonna, Túrikmenstan - 0,3 mln tonna), Aýǵanstanǵa - 1,2 mln tonna, QHR-ǵa - 481,1 myń tonna, Iranǵa - 34,9 myń tonna», - dep atalyp ótken vedomstvo aqparatynda.
Mınıstrlik málimetine qaraǵanda, qazirgi kezde «Azyq-túlik korporatsııasy» UK» AQ Ózbekstan, QHR, Ázerbaıjan, Iran jáne basqa da elderdiń satyp alýshylarymen synyptan tys bıdaıdy satý boıynsha kelissózderdi jalǵastyryp jatyr.
