Qazaqstan-Brıtan tehnıkalyq ýnıversıteti memleketke qaıtaryldy
ASTANA. KAZINFORM – Endi Qazaqstan-Brıtan tehnıkalyq ýnıversıteti memleket menshiginde.
Qarjy mınıstrliginiń qarjylyq eseptilik depozıtarııi saıtynda jarııalanǵan málimetke sáıkes, 2025 jylǵy 27 aqpannan bastap Qazaqstan-Brıtan tehnıkalyq ýnıversıtetiniń jańa ıesi «Qaıtarylǵan aktıvterdi basqarý jónindegi kompanııa» jaýapkershiligi shekteýli seriktestigi, al onyń jalǵyz quryltaıshysy jáne qatysýshysy – Qazaqstan Respýblıkasynyń Úkimeti.
«Qazaqstan-Brıtan tehnıkalyq ýnıversıteti» AQ Qazaqstan Respýblıkasy Úkimetiniń 2001 jylǵy 3 tamyzdaǵy qaýlysymen quryldy. Qazaqstan tarapynan quryltaıshy retinde QR Úkimeti Bilim jáne ǵylym mınıstrligi atynan qatyssa, brıtandyq taraptan QBTÝ-dyń seriktesteri retinde Qazaqstandaǵy Ulybrıtanııa elshiligi men brıtandyq keńes boldy.
2003 jyldan bastap «Qazaqstan-Brıtan tehnıkalyq ýnıversıteti» AQ-nyń jalǵyz aktsıoneri «QazMunaıGaz» AQ boldy (QR Úkimetiniń 2003 jylǵy 26 qyrkúıektegi qaýlysyna sáıkes).
2018 jyly Qazaqstan-Brıtan tehnıkalyq ýnıversıtetiniń aktsııalar paketi QR Úkimetiniń 2015 jylǵy 30 jeltoqsandaǵy №1141 qaýlysymen bekitilgen jekeshelendirý baǵdarlamasy aıasynda «Nursultan Nazarbaev bilim qory» qoǵamdyq qory satyp aldy.
Byltyr kúzde qaıtarylǵan aktıvterdiń qanshasy memleket menshigine ótkeni týraly jazǵan bolatynbyz.
Sonymen qatar memleketke qaıtarylǵan 12 mıllıard teńge aktıvtiń qaıda jumsalatynyn habarladyq.