Qazaqstan Brıtan eliniń Aýǵanstannan alyp ketetin júkteriniń tranzıtin qamtamasyz etetin bolady - Májilis
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń Úkimeti men Ulybrıtanııa Koroldiginiń Úkimeti arasyndaǵy Ulybrıtanııa jáne Soltústik Irlandııa Qurama Koroldigi Qarýly Kúshteriniń
Aýǵanstan Islam Respýblıkasyn turaqtandyrý men qalpyna keltirý jónindegi halyqaralyq is-qımyldarǵa qatysýyna baılanysty Qazaqstan Respýblıkasynyń aýmaǵy arqyly júktiń/arnaıy júktiń tranzıtin qamtamasyz etý týraly kelisimdi ratıfıkatsııalaý týraly» zań jobasy maquldandy.
Atalǵan kelisim 2014 jyldyń 15 sáýirinde Astanada jasalǵan bolatyn. Kelisim Aýǵanstan qaýipsizdigin qamtamasyz etý, ony turaqtandyrý men qalpyna keltirý jónindegi halyqaralyq is qımyldardy qoldaý maqsatynda Brıtan tarapynyń ilesip júretin personalynyń júkter tranzıtin júzege asyrý tártibi aıqyndalady. Bul rette Brıtan tarapy kelisimge sáıkes, júktiń tranzıtin júzege asyrý barysynda Qazaqstannyń zańnamasyn saqtaýǵa, sonymen qatar Qazaqstannyń ishki isterine aralaspaýǵa mindetti bolady. Al Qazaqstan tarapy eger tranzıttiń osy Kelisimge sáıkes kelmeıtini nemese elimizdiń ulttyq qaýipsizdigine qater tóndiretini anyqtalǵan bolsa, júktiń tranzıtine ruqsat berýden bas tartýǵa ne tranzıtke ruqsattyń qoldanysyn toqtatýǵa quqyǵy bolady. Budan bólek, Brıtan tarapy kólik-ekspedıtsııalyq agenttikter, kompanııalar arasynda jasalǵan sharttar negizinde Qazaqstan aýmaǵy arqyly ótetin júktiń tranzıtine baılanysty barlyq shyǵyndardy ózderi kóteretin bolady.
Májilis maquldaǵan zań jobasy Senatqa joldanatyn bolady.
