Qazaqstan «Brıllıantovaıa babochka» kınosyılyǵynyń eki júldesin jeńip aldy

ASTANA. KAZINFORM — Máskeýde «Brıllıantovaıa babochka» ashyq Eýrazııalyq kınosyılyǵyn ekinshi ret tabystaý rásimi ótti. Qazaqstandyq kınogerler eki atalymda jeńimpaz atandy.

🏆Qazaqstan «Brıllıantovaıa babochka» kınosyılyǵynyń eki júldesin jeńip aldy
Foto: Mádenıet jáne aqparat mınıstrligi

Rejısser Dýman Erkimbektiń «Qaitadan» fılminde basty róldi somdaǵan Jasulan Kópbergen úzdik akter dep tanyldy. Al Farhat Sharıpovtyń «Evakýatsııa» fılmindegi jumysy úshin Aleksandr Plotnıkov «Úzdik operator» atalymynda marapattaldy.

Týyndyny QR Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen «Dala Cinema» kınokompanııasy túsirgen. Bul memlekettik qoldaýmen túsirilgen qazaqstandyq fılmderdiń ishinde prokattaǵy tabysy 1 mlrd teńgeden asqan alǵashqy týyndy. 

Fılmde aýylǵa kelgen qalalyq jigittiń ýaqyt tuzaǵyna túsip, bir oqıǵany qaıta-qaıta bastan keshýi baıandalady. Týyndyda jaýapkershilik, janashyrlyq pen urpaqtar sabaqtastyǵy taqyryptary qozǵalady.

«Evakýatsııa» tarıhı dramasyn Sháken Aımanov atyndaǵy «Qazaqfılm» ulttyq kınostýdııasy túsirgen. Fılm Uly Otan soǵysy jyldarynda Qazaqstanǵa kóshirilgen adamdardyń taǵdyryn baıandaıdy. Týyndynyń rejısseri, stsenarıı avtory ári prodıýseri – Farhat Sharıpov.

Kınosyılyqqa úmitkerlerdiń qorytyndy tizimine mınıstrlik pen Kıno ortalyǵynyń qoldaýymen túsirilgen Ádil Merekeniń «Kúzgi samal» jáne Gúlshat Smaǵulovanyń «Shatyrdaǵy ekeý» fılmderi de endi.

Bıyl júldege 19 elden 41 fılm talasty. Jeńimpazdar 12 atalym boıynsha anyqtaldy.

Aıta keteıik, Germanııa astanasy Berlınde Qazaqstan kınosy kúnderi uıymdastyrylyp, nemis kórermenderine «Qazaq handyǵy. Almas qylysh» jáne «Jeruıyq» kórkem fılmderi usynyldy.