Qazaqstan BRIKS-ti jahandyq progrestiń qozǵaýshy kúshteriniń biri retinde qarastyrady — Prezıdent
QAZAN. KAZINFORM — Qazaqstan BRIKS-ti jahandyq progrestiń qozǵaýshy kúshteriniń biri retinde qarastyrady. Bul týraly Memleket basshysy Qasym-Jomart Toqaev BRIKS-tiń XVI sammıti plenarlyq otyrysynyń «BRIKS+»/«aýtrıch» formatyndaǵy jıynynda aıtty.
«Bizdiń elimiz BRIKS-ke múshe memleketterdiń Taıaý Shyǵystaǵy jaǵdaıdyń shıelenisýine, onyń saldarynan adam shyǵyny men gýmanıtarlyq apatqa ákelip soqtyrǵanyna alańdaýshylyq tanytýyn qoldaıdy. Kedeıshilik, teńsizdik jáne bilimniń jetispeýshiligi sııaqty janjaldardyń túpki sebepterin joıý úshin birlesip jumys isteý, bizdiń oıymyzsha, halyqaralyq saıası yntymaqtastyqty nyǵaıtýdyń negizgi faktory bolyp qala beredi. Qazaqstan BUU Qaýipsizdik keńesin reformalaýdy jáne onyń Afrıka, Latyn Amerıkasy jáne Azııa elderinen jańa múshelerdi qosý esebinen keńeıtilýin qoldaıdy», - dedi Qasym-Jomart Toqaev.
Memleket basshysy beıbitshilik pen qaýipsizdik máselelerin sheshýde jahandyq ońtústik elderiniń úni estilýi tıistigin basa aıtty.
«BRIKS jahandyq basqarý qurylymyndaǵy orta derjavalar men damyp kele jatqan ekonomıkalar dep atalatyn elderdiń ókildigin kúsheıtý arqyly bul úderiste sheshýshi ról atqara alady. Qazaqstan BRIKS-ti jahandyq progrestiń qozǵaýshy kúshteriniń biri retinde qarastyrady», - dedi Prezıdent.
QR Prezıdenti Qasym-Jomart Toqaev Reseı Federatsııasynyń Prezıdenti Vladımır Pýtınniń shaqyrýymen BRIKS-ke múshe memleketter basshylarynyń XVI Sammıtine qatysý úshin Qazan qalasyna jumys saparymen barǵan bolatyn.
Memleket basshysy BRIKS sammıtine qatysýshylarmen birqatar kezdesý ótkizdi.
QR Prezıdenti jáne ózge BRIKS+ sammıtine qatysýshylar birge sýretke tústi.
