Qazaqstan BRIKS Sammıti aıasynda ekologııalyq jáne gýmanıtarlyq basymdyqtaryn belgiledi
ASTANA. KAZINFORM — Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileý BRIKS múshe men seriktes elderi basshylarynyń 17-shi sammıti jumysyna qatysýdy jalǵastyryp, «Qorshaǵan orta, SOR30, jahandyq densaýlyq» sessııasynda sóz sóıledi.
Sessııa barysynda qatysýshylar qorshaǵan ortany qorǵaý, BUU Klımattyń ózgerýi jónindegi negizdemelik konventsııasynyń Taraptar konferentsııasyna (SOR30) daıyndyq, sondaı-aq jahandyq densaýlyq saqtaý júıelerin nyǵaıtý máselelerin talqylady.
Óz sózinde Qazaqstan syrtqy saıası vedomstvosynyń basshysy ekojúıelerdi saqtaý, ormandardy qorǵaý, Aral teńizin qalpyna keltirý jáne muzdyqtardyń erý úderisterin tejeý boıynsha birlesken kúsh-jigerdiń mańyzdylyǵyna nazar aýdardy.
Klımattyq qaterlerdiń aldyn alýǵa basymdyq berý qajettigin atap ótken Murat Nurtileý erte eskertý júıelerin damytý, tótenshe jaǵdaılarǵa daıyndyqty arttyrý jáne kópjaqty úılestirýdi kúsheıtýge shaqyrdy. Osyǵan baılanysty ol Qazaqstannyń klımattyq monıtorıng pen tótenshe jaǵdaılardy boljaýǵa arnalǵan ulttyq spýtnıktik tehnologııalaryn paıdalaný jónindegi bastamasyn tanystyrdy.
Mınıstrdiń baıandamasynda densaýlyq saqtaý máselelerine de erekshe nazar aýdaryldy. Qazaq tarapy memleketterdi Alǵashqy medıtsınalyq-sanıtarlyq kómekti damytý jónindegi jahandyq koalıtsııaǵa qosylýǵa shaqyrdy. Onyń negizi densaýlyq saqtaý salasyndaǵy mańyzdy halyqaralyq qujat — 1978 jylǵy Almaty deklaratsııasynan bastaý alady.
— Elderimiz tabıǵı resýrstarǵa, bilimge jáne áleýetke baı. Biraq eń bastysy — bizdi ortaq múddeler biriktiredi. Qazaqstan adamzat pen planeta ıgiligi úshin BRIKS-pen seriktestikti nyǵaıtýǵa daıyn. Birlese jáne aldyn ala áreket eteıik. Osy oraıda Sizderdi 2026 jyly Qazaqstan BUU-men seriktestikte ótkizetin Óńirlik ekologııalyq sammıtke qatysýǵa shaqyramyn, — dep atap ótti Murat Nurtileý.
Mınıstr sondaı-aq jyly qabyldaý, is-sharany joǵary deńgeıde uıymdastyrý jáne Jahandyq Ońtústik elderi arasyndaǵy ózara túsinistikti nyǵaıtýǵa yqpal etken ashyq dıalog atmosferasy úshin Brazılııa tarapyna rızashylyǵyn bildirdi.
Sammıtqa qatysý aıasynda Qazaqstan SІM basshysy Túrkııanyń Syrtqy ister mınıstri Hakan Fıdanmen jeke kezdesý ótkizip, taraptar ekijaqty jáne kópjaqty formattardaǵy yntymaqtastyqty damytý joldaryn, sondaı-aq ózara qyzyǵýshylyq týdyratyn basqa da máselelerdi talqylady.
Aıta ketelik Qazaqstan BRIKS sammıtiniń maqsaty men mindetterin tolyǵymen qoldaıtyny týraly jazǵan edik.