Qazaqstan BRIKS+ formatyndaǵy syrtqy ister mınıstrleriniń kezdesýine qatysty
Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Joǵaryda atalǵan is-sharaǵa BRIKS-ke múshe memleketter (Brazılııa, Reseı, Úndistan, Qytaı, Ońtústik Afrıka) jáne arnaıy shaqyrylǵan elder – «BRIKS dostary» (Qazaqstan, Argentına, Bangladesh, Býrýndı, Gabon, KDR, Mysyr, Iran, Indonezııa, Komor araldary, BAÁ, Saýd Arabııasy, Ýrýgvaı) qatysty.
Qazaqstan osy forýmǵa AÓSShK-niń qazirgi tóraǵasy jáne ShYU-nyń bolashaq tóraǵasy retinde shaqyryldy.
Mınıstrlik forýmy «Ózara jedeldetilgen ósýdi, turaqty damýdy jáne ınklıýzıvti kópjaqtylyqty qamtamasyz etý úshin yntymaqtastyqtan ujymdyq áreketke kóshý» uranymen ótti.
Óz sózinde Q. Omarov qazirgi zamannyń ózekti máselelerin sheshý maqsatynda ujymdyq kúsh-jigerdiń mańyzdylyǵyn atap ótti. Osy rette ol QR Prezıdenti Qasym-Jomart Toqaevtyń halyqaralyq qaýipsizdik pen turaqtylyqty nyǵaıtýǵa baǵyttalǵan bastamalaryn, atap aıtqanda, Ortalyq Azııa men Aýǵanstan elderi úshin Turaqty damý maqsattary jónindegi BUU óńirlik habyn jáne Bıologııalyq qaýipsizdik jónindegi halyqaralyq agenttikti qurý boıynsha bastamalaryn eske saldy.
Qazaqstandyq dıplomat forým qatysýshylarynyń nazaryn halyqaralyq quqyq jáne BUU Jarǵysy qaǵıdattaryna negizdelgen BRIKS, AÓSShK men ShYU-nyń maqsattary, mindetteri men qaǵıdattarynyń sınergııasyna aýdardy. Ol QR men BRIKS-ke múshe elder arasynda saýda-ekonomıkalyq yntymaqtastyqtyń joǵary deńgeıine qol jetkizilgenin atap ótti.
Buǵan 2022 jyly 50 mlrd AQSh dollarynan asqan osy birlestiktiń memleketterimen Qazaqstannyń jıyntyq taýar aınalymy dálel bolyp tabylady.
Osyǵan baılanysty Q. Omarov: «Qazaqstan Respýblıkasy damýshy ekonomıkalar yntymaqtastyǵynyń úlgisin kórsete otyryp, qazirgi zamannyń ózekti máselelerin talqylaý úshin pármendi jáne tıimdi alańǵa aınalǵan BRIKS-ke qosylýǵa múddeli», – dep atap ótti.
BRIKS mınıstrlik kezdesýi aıasynda Qazaqstan SІM ókili Ońtústik Afrıka Respýblıkasynyń Halyqaralyq qatynastar jáne yntymaqtastyq mınıstri Naledı Pandormen kelissózder júrgizdi. Kezdesý barysynda Q. Omarov Ońtústik Afrıka mınıstrine Memleket basshymyzdyń Ońtústik Afrıka Prezıdenti Sırıl Ramaposaǵa joldaǵan hatyn tapsyrdy. Taraptar elder arasyndaǵy ekijaqty saıası-ekonomıkalyq yntymaqtastyqty jandandyrý, kópjaqty formattaǵy tyǵyz ózara is-qımyl máselelerin talqylady, sondaı-aq ózara qyzyǵýshylyq týdyratyn ózekti halyqaralyq jáne óńirlik máseleler boıynsha pikir almasty.
Sondaı-aq Q. Omarov mınıstrlik otyrysyna qatysqan basqa delegatsııalardyń basshylarymen de kezdesýler ótkizdi.
