Qazaqstan BRICS elderimen energetıka, sý jáne kólik salasyndaǵy yntymaqtastyqty damytpaq
ASTANA. KAZINFORM - Qazaqstan Respýblıkasynyń Úndistan Respýblıkasyndaǵy Elshisi Azamat Eskaraev energetıkalyq qaýipsizdik pen ornyqtylyqty qamtamasyz etýdegi BRICS basymdyqtaryna arnalǵan «BRICS Energy Partnerships for Progress and Prosperity» dıplomatııalyq dıalogyna qatysty.
QR Syrtqy ister mınıstrligi baspasóz qyzmetiniń habarlaýynsha, is-sharaǵa BRICS-ke qatysýshy memleketter men seriktes elderdiń dıplomatııalyq mıssııalarynyń basshylary, sondaı-aq Úndistannyń sarapshylyq jáne akademııalyq qoǵamdastyǵynyń ókilderi qatysty.
Talqylaý barysynda BRICS sheńberindegi energetıkalyq yntymaqtastyqtyń perspektıvalary, jańartylatyn energetıkany damytý, synı mańyzy bar mıneraldar, zamanaýı energetıkalyq tehnologııalar, ınfraqurylym jáne ınvestıtsııalyq ózara is-qımyl máseleleri boıynsha pikir almasý boldy. Jetkizý tizbekteriniń ornyqtylyǵyn nyǵaıtý, jańa energetıkalyq jáne kóliktik dálizderdi damytý, sondaı-aq BRICS qatysýshylary men seriktesteri arasyndaǵy tehnologııalyq yntymaqtastyqty keńeıtý qajettigi atalyp ótti.
Óz sózinde Elshi Eskaraev BRICS sheńberinde energetıkalyq yntymaqtastyqty damytý jónindegi Qazaqstannyń ustanymyn tanystyryp, eldiń dástúrli jáne jańartylatyn energetıka, synı mańyzy bar mıneraldar jáne eýrazııalyq kóliktik-energetıkalyq baılanystylyqty damytý salasyndaǵy áleýetin atap kórsetti.
Іs-shara aıasynda Qazaqstan Respýblıkasynyń Prezıdenti Qasym-Jomart Toqaevtyń BUU janynan Halyqaralyq sý uıymyn qurý jónindegi bastamasy jarııa etildi. Energetıkalyq, azyq-túlik jáne sý qaýipsizdigi máseleleriniń bir-birimen tyǵyz baılanysty ekeni, al sý resýrstaryna túsetin qysymnyń artýy halyqaralyq úılestirýdi kúsheıtýdi talap etetini atap ótildi.
Osy is-sharaǵa qatysý ú.j. 12-13 qyrkúıekte Nıý-Delıde ótetin BRICS sammıtine qazaqstandyq delegatsııanyń qatysý qarsańynda eldiń basymdyqtaryn belgileýge, sondaı-aq birlestiktiń kún tártibin mazmundy tolyqtyrýǵa úles qosýǵa múmkindik berdi.
Aıta keteıik, Qazaqstannyń Halyqaralyq sý uıymyn qurý bastamasy ShYU sammıtinde de aıtyldy.
