Qazaqstan Brazılııaǵa borttyq ózdiginen jazǵyshtardy jiberedi

ASTANA. KAZINFORM -  Chıkago konventsııasynyń 13 qosymshasyna sáıkes tergeý júrgizetin memleket borttyq ózdiginen jazǵysh derekterin oqýdy qamtamasyz etedi jáne olardy qaı elde taratyp jazý týraly sheshim qabyldaıdy. Bul týraly QR Kólik mınıstrligi habarlady.

Qazaqstan bul Konventsııany 1992 jyly ratıfıkatsııalady jáne Halyqaralyq Azamattyq avıatsııa uıymynyń (IKAO) múshesi bolyp tabylady.

Joǵaryda atalǵan qujattyń negizinde, sondaı-aq IKAO usynymdaryn eskere jáne Ázerbaıjan men Reseıdiń avıatsııalyq bılik ókilderimen keńese otyryp, QR Kólik mınıstri Marat Qarabaev basqaratyn avıatsııalyq oqıǵany tergeý jónindegi Komıssııa borttyq ózdiginen jazǵyshtardy (qara jáshikterdi) Embraer áýe kemesin shyǵarýshy Brazılııanyń avıatsııalyq oqıǵalardy tergeý jáne aldyn alý ortalyǵyna (CENIPA) jiberý týraly sheshim qabyldady.

CENIPA ortalyǵynda qajetti tehnıkalyq múmkindikter qarastyrylǵan, tıisti quraldarmen jabdyqtalǵan jáne olardy oqý úshin sertıfıkattalǵan zerthana bar.

Bul másele Memleket basshysynyń jeke baqylaýynda.

Eske sala keteıik, 25 jeltoqsanda Aqtaý mańynda Azerbaijan Airlines ushaǵy apatqa ushyrady.

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bar.

Prezıdent ushaq apatynan zardap shekkenderge kómek kórsetýdi erekshe baqylaýda ustaýdy tapsyrdy.

Ázerbaıjan Respýblıkasynyń prezıdenti Ilham Álıev Aqtaý mańynda bolǵan ushaq apatyna toqtalyp, qazaq halqyna alǵys aıtty.