Qazaqstan Brazılııa tájirıbesin engizip, agrarlyq ǵylymdy damytýdy kózdeıdi
ASTANA. KAZINFORM — Aýyl sharýashylyǵy vıtse-mınıstri Amanǵalı Berdalın Qazaqstandaǵy Brazılııa Federatıvtik Respýblıkasynyń Tótenshe jáne ókiletti elshisi Marselo Fortýna Bıatomen kezdesti.
Taraptar agroónerkásiptik keshendegi ekijaqty yqpaldastyqtyń qazirgi jaı-kúıi men damý bolashaǵyn, ásirese mal sharýashylyǵyn damytýdyń ózekti máselelerin talqylady.
Áńgime barysynda eki el arasyndaǵy agroónerkásip salasyndaǵy taýar aınalymy 89,5 mln AQSh dollar bolyp, 10%-ǵa óskeni aıtyldy.
Vıtse-mınıstr Memleket basshysynyń tapsyrmasy boıynsha ázirlengen mal sharýashylyǵyn damytýǵa arnalǵan keshendi jospar jóninde baıandady.
— Jospar aıasynda jyldyq 6% syıaqy mólsherlemesimen mal sharýashylyǵyn damytýǵa baǵyttalǵan jeńildetilgen nesıeleýdiń jańa baǵdarlamasy iske qosyldy. Nesıelik qarajat aýyl sharýashylyǵy janýarlarynyń basyn kóbeıtýge jáne sharýashylyqtardyń óndiristik tıimdiligin arttyrýǵa baǵyttalady. Baǵdarlamanyń iske qosylýy agrarlyq sala ókilderi úshin memlekettik qoldaýdyń mańyzdy quralyna aınalmaq jáne mal sharýashylyǵynyń damýyna qosymsha serpin beredi dep kútilýde, — dedi vıtse-mınıstr.
Kezdesý kezinde ǵylymı-tehnologııalyq yntymaqtastyq máselelerine de erekshe nazar aýdaryldy. Atap aıtqanda, «Ulttyq agrarlyq ǵylymı-bilim berý ortalyǵy» brazılııalyq tarappen áriptestikti tereńdetýge qyzyǵýshylyq bildirdi. Bul baǵytta Brazılııanyń agrarlyq ǵylym júıesin zertteý, ǵylymı ázirlemelerdi kommertsııalandyrý tájirıbesin zerdeleý jáne Qazaqstannyń agrarlyq ǵylymyn jetildirý boıynsha usynystar ázirleý josparlanyp otyr.
Sondaı-aq qazaqstandyq ǵalymdardyń taǵylymdamadan ótý múmkindikterin, EMBRAPA ǵylymı-zertteý ınstıtýttarynyń bazasynda birlesken zertteýler júrgizýdi, tehnologııalar transfertin jáne brazılııalyq sarapshylardy birlesip qarjylandyrý arqyly tartý máseleleri talqylandy.
Sonymen qatar, qus jáne mal sharýashylyǵynda zamanaýı fermalar salý boıynsha brazılııalyq tájirıbeni engizý, astyqty saqtaý jáne óńdeý júıelerin damytý, aýyl sharýashylyǵyn mehanıkalandyrý, zamanaýı aýyl sharýashylyǵy tehnıkasymen jumys isteý úshin kadrlardy daıarlaý jáne oqytý baǵyttaryndaǵy áriptestikti ilgerletýge ózara yntalylyq bildirdi.
Odan ári taraptar atalǵan saladaǵy seriktestikti keńeıtýge jáne birlesken jobalardy júzege asyrýǵa daıyn ekendikterin jetkizdi.
Aıta ketelik Slovakııa Qazaqstannyń orman sharýashylyǵy mamandarynyń biliktiligin arttyratyny týraly jazǵan edik.