Qazaqstan bir jylda 435,4 myń sheteldikke JSN bergen

ASTANA. KAZINFORM – Qazaqstan byltyr 435 408 adamǵa uıaly baılanys operatoryna tirkelip, bank kartasy men shotyn ashýǵa múmkindik beretin jeke sáıkestendirý nómirin bergen. Bul týraly Іshki ister mınıstrligi Kazinform agenttiginiń saýalyna joldaǵan jaýapta aıtylǵan.

- 2024 jyldyń 12 aıynda elimizge 15 294 699 sheteldik keldi. Onyń ishinde 5 860 195 Ózbekstan, 3 271 654 Reseı, 962 583 Tájikstan, 3 335 475 Qyrǵyzstan azamaty kirdi, - dep jazylǵan resmı málimette.

Mınıstrlik málimetinen osy 15 mln sheteldik úshin Qazaqstan tranzıttik aýmaq bolǵanyn kórýge bolady. Óıtkeni, el aýmaǵyna bir jylda kirgen adamnyń tek 41 851-i ǵana turaqtap qalǵan.

- Osy kezeńde 15 252 848 sheteldik shyqty. Onyń ishinde – 5 820 299 Ózbekstan, 3 301 001 Reseı, 960 926 Tájikstan, 3 329 523 Qyrǵyzstan azamaty shyqty. 2024 jyly elge kelgen sheteldikterge 435 408 JSN rásimdeldi. Jalpy QR kelgen barlyq shetel azamattarynyń bolý merzimi 30 kún, - delingen jaýapta.

Bul málimetten Qazaqstan aýmaǵyna tek JSN rásimdeý úshin ǵana kiretin sheteldikterdiń kóp bolǵanyn baıqaýǵa bolady.

Jalpy elimizde Reseı, Qyrǵyzstan, Tájikstan azamattary ýaqytsha esepke turmaı 90 kún bola alady, Ózbekstan azamattarynyń bolý merzimi – 30 kún.

ІІM aqparatyna súıensek, 2025 jyldyń basynan qańtar aıynyń aıaǵyna deıin elimizge 925 152 sheteldik kelgen. Onyń ishinde 177 892 Reseı, 367 228 Ózbekstan, 46 037 Tájikstan, 222 712 Qyrǵyzstan azamaty bar.

- Bıyl 902 570 sheteldik elimizden ketti. Onyń ishinde 212 795 Reseı, 314 388 Ózbekstan, 45 113 Tájikstan, 218 565 Qyrǵyzstan azamaty bar. 2025 jyly elimizge kelgen 27 186 sheteldikke JSN rásimdeldi, - dep jazady mınıstrlik mamandary.

Eske salsaq, 2024 jyldyń aqyrǵy kúninde Qazaqstan shetel azamattaryna JSN berýdi ýaqytsha toqtatatyny habarlanǵan edi.