Qazaqstan «Bir Qytaı» qaǵıdatyn qoldaıdy – SІM

Qazaqstan Syrtqy ister mınıstrligi Taıvandaǵy saılaý qorytyndysyna qatysty málimdeme jasady, dep habarlaıdy Kazinform.  

«Taıvanda ótken saılaýǵa baılanysty Qazaqstan Respýblıkasy «Bir Qytaı» qaǵıdatyn tabandy túrde qoldaıtynyn qaıta málimdeıdi jáne Qytaı Halyq Respýblıkasynyń úkimeti búkil Qytaıdy bildiretin jalǵyz zańdy úkimet. Al Taıvan Qytaı aýmaǵynyń ajyramas bóligi ekenin rastaıdy. Qytaı Halyq Respýblıkasy úkimetiniń eldi beıbit jolmen biriktirý jolyndaǵy kúsh-jigerin qoldaımyz», — delingen mınıstrlik habarlamasynda.

Taıvandaǵy prezıdent saılaýynda bıliktegi Demokratııalyq progressıvti partııanyń (DPP) kandıdaty Laı Tsınde jeńiske jetken bolatyn. Taıvanda sonymen birge zań shyǵarýshy ıýanǵa (Parlamentke) saılaý ótti.