Qazaqstan boıynsha 2480 eski traktor kádege jaratýǵa jiberilgen

NUR-SULTAN. QazAqparat – Kádege jaratý alymyn engizgen kezden beri 2480 traktor, 900 kombaın kádege jaratýǵa ótkizilgen. Bundaı málimetti Indýstrııa jáne ınfraqurylymdyq damý mınıstrligi Avtomobıl qurastyrý, arnaıy jáne aýylsharýashylyq mashınajasaý basqarmasynyń basshysy Rýslan Hısamýtdınov keltirdi, dep habarlaıdy QazAqparat tilshisi.

«Aýyl sharýashylyǵy mınıstrliginiń aldyn ala derekteri boıynsha, búgingi tańda aýyl sharýashylyǵy qurylymdarynyń parkinde 141 myńnan astam traktor, 36 myńnan astam kombaın bar. Olardyń tozý deńgeıine kelsek, 80 paıyzynyń «jasy» 10 jyldan asady. Osynyń bárin eskerip, qoldaǵy parktiń jańarýy 3 paıyzdyń aınalasynda ekenin túsinip otyrmyz. Bizdegideı tozý jaǵdaıynda parkti jańartý qarqyny jylyna 6 paıyz bolýy kerek edi», - dedi maman.

Mınıstrlik ókiliniń aıtýynsha, qoldanystaǵy kádege jaratý alymynyń aıasynda vaýcherlik tetik boıynsha parkti jańartý qarastyrylǵan.

«Eskirgen traktorlar men kombaındardy ótkizgenderge otandyq tehnıka satyp alý úshin jeńildik nemese aqshalaı ótem beriledi. Kádege jaratý alymyn engizgen kezden beri 2480 traktor, 900 kombaın kádege jaratýǵa ótkizilgen. Bir de bir kombaın men traktor kádege jaratýǵa tapsyrylǵan joq degen málimet aıtylyp jatyr. Soǵan baılanysty aıtyp otyrmyn», -dedi mınıstrliktiń basqarma basshysy Rýslan Hısamýtdınov.