Qazaqstan boıynsha sý basý qaýpi bar eldi mekender sany azaıdy — TJM

ASTANA. KAZINFORM — Qazaqstanda sý tasqynynyń aldyn alý úshin 166 shaqyrym ózen arnalary tereńdetilip, 250 shaqyrym jaǵalaý nyǵaıtyldy. Sonymen qatar el boıynsha 760-tan astam is-shara oryndaldy.

Bul týraly QR TJM Tótenshe jaǵdaılardyń aldyn alý komıtetiniń tóraǵasy Serik Júnisbekov málimdedi. Onyń aıtýynsha, óńirlik josparlar boıynsha kózdelgen 821 is-sharanyń 760-y oryndalǵan.

Sondaı-aq áleýmettik-ekonomıkalyq jáne óńirlik damý josparlarynda qarastyrylǵan 250 is-sharanyń 201-i júzege asqan.

— Óńirlerde 831 shaqyrym qorǵanysh bógetter salyndy. 1 128 shaqyrym drenaj júıeleri, kanaldar men aryqtar jóndelip, jańartyldy. Avtomobıl jáne temirjol joldarynda 934 sý ótkizý qurylysy ornatylyp, aýystyryldy, — dedi Serik Júnisbekov OKQ alańynda ótken dóńgelek ústelde.

Onyń sózinshe, ózenderdiń sý tasqyny qaýpi joǵary ýchaskelerinde de jumystar júrgizilgen.

— Budan bólek, 221 shaqyrym ózen arnalary túzetilip, 172 shaqyrymy tazartyldy. Nátıjesinde sý tasqyny qaýpi bar 1 242 eldi mekenniń 234-inde qorǵanys deńgeıi artty, al 736 eldi meken úshin sý basý qaýpi tómendedi, — dedi ol.

Qazirgi ýaqytta sý tasqyny jaǵdaıy turaqty baqylaýda.

— Elimizdiń 10 óńirinde 130 eldi mekendi qamtyǵan 17 aerovızýaldy tekseris júrgizildi. Bul jumystar jalǵasady, — dedi komıtet tóraǵasy.

Sonymen qatar aldyn alý sharalary qolǵa alynǵan.

— Eldi mekenderden 5 mln tekshe metrden astam qar shyǵaryldy. 126 myń tonna janar-jaǵarmaı, 374 myń tonna ınertti materıal jáne 4,5 mln qap daıyndaldy. Qaýipti ýchaskelerde jarylys jumystaryn júrgizý jáne azyq-túlikpen qamtamasyz etý boıynsha kelisimder jasaldy, — dep túıindedi Serik Júnisbekov.

Aıta keteıik, buǵan deıin tasqynnyń aldyn alý úshin sý qoımalarynan sý jiberilip jatqany habarlanǵan bolatyn.