Qazaqstan boıynsha Alakólde ǵana kezdesetin relıkti shaǵalaǵa GPS qondyrǵysy ornatyldy
TALDYQORǴAN. KAZINFORM- Bıyl maýsym aıynda alǵash ret Qyzyl kitapqa engen relıkti shaǵalaǵa GPS qondyrǵysy ornatylǵan edi. Zertteýshiler qazirgi ýaqytta Alakólden ushqan shaǵalalar tobynyń basqa memlekette júrgenin habarlady.
«Alakól memlekettik tabıǵı qoryǵynyń» ǵylym, aqparat jáne monıtorıng bóliminiń málimetine súıensek, 2024 jyly «Zoologııa ınstıtýty» qyzmetkerlerimen birlesip uıymdastyrylǵan dalalyq ekspedıtsııa barysynda ógizshaǵala men úsh relıkti shaǵalaǵa GPS qondyrǵysy ornatylǵan. Mamandar sol arqyly qustardyń ushý joldaryn anyqtap, baqylap otyr.
- Qazirgi tańda ornatylǵan GPS trekerler arqyly baqylaý jumystary «Zoologııa ınstıtýty» qyzmetkerleri, atap aıtqanda, b.ǵ.k. Gavrılov A.E. tarapynan júrgizilip otyr. Ornatylǵan GPS trekerdiń derekteri boıynsha, Orta Araltóbe aralynda uıa salǵan relıkti shaǵala Alakól kóliniń Aqshı, Kóktuma aýyldary mańynda jáne Alakól kóliniń shyǵys jaǵalaýy boıynda qorektengeni anyqtalǵan. Al qystaýǵa Qytaı Halyq Respýblıkasynyń soltústik-batysynda ornalasqan Úlińgir atty kóline ushyp ketkeni belgili boldy, – dedi «Alakól memlekettik tabıǵı qoryǵynyń» ǵylym, aqparat jáne monıtorıng bóliminiń basshysy Aıjan Tólebaeva.
Birlesken dalalyq ekspedıtsııa barysynda budan bólek buıra jáne qyzǵylt birqazan, qarabas ógizshaǵala, aqbas tyrna, úlken sýquzǵyn, dala qyrany, tilemish sııaqty qustardan bıoanalız synamalary alynyp, saqınalar taǵylǵan.
Aıta keteıik, bul zertteýler 2024 jyldyń 2-shi toqsanynda QR ETRM Orman sharýashylyǵy jáne janýarlar dúnıesi komıtetimen kelisilgen. Sondaı-aq, zertteý jumystary QR ǴJBM Bilim komıteti «ál-Farabı atyndaǵy Qazaq Ulttyq Ýnıversıteti» UAQ-nyń bıoalýantúrlilik jáne bıoresýrstar kafedrasy men QR BǴM Bilim komıteti «Zoologııa ınstıtýty» RMK arasyndaǵy ǵylymı yntymaqtastyq týraly jasalǵan sharttar aıasynda júrgizilgen.
Eske salaıyq osyǵan deıin Altynemel ulttyq parkine ákelingen 30 qulannyń sany 3600-ge jetkenin jazǵanbyz.
