Qazaqstan boıynsha 411 ruqsat etilmegen qoqys polıgony anyqtalǵan
ASTANA. KAZINFORM — Ekologııa jáne tabıǵı resýrstar mınıstri Erlan Nysanbaevtyń tóraǵalyǵymen zańsyz qoqys polıgondaryn anyqtaý jáne joıý boıynsha keńes ótti.
Vedomstvonyń baspasóz qyzmetiniń málimetinshe, kezdesý barysynda aýmaqtarda ruqsat etilmegen qaldyqtardy ornalastyrý oryndaryn anyqtaý jáne joıý boıynsha júrgizilip jatqan jumystardyń nátıjeleri, sondaı-aq jergilikti atqarýshy organdar, aýmaqtyq ekologııa departamentteri jáne basqa da tıisti memlekettik organdar arasyndaǵy ózara is-qımyl talqylandy.
Ekologııalyq retteý jáne baqylaý komıtetiniń tóraǵasy anyqtalǵan qoqys polıgondarynyń aǵymdaǵy jaǵdaıy, olardy joıý boıynsha qabyldanyp jatqan sharalar jáne ǵaryshtyq monıtorıng nátıjeleri týraly baıandady.
— 2026 jyldyń basynan beri elimiz boıynsha 411 ruqsat etilmegen qoqys polıgony anyqtalǵany, onyń 82-si joıylǵany, bul jalpy sanynyń 20%-yn quraıdy. Osyǵan baılanysty mınıstr ákimdikterdiń qoqys polıgondaryn jedel joıý jáne zańsyz qaldyqtardy ornalastyrý oryndarynyń qaıta paıda bolýyna jol bermeý jónindegi kúsh-jigerin kúsheıtý qajettiligin atap ótti, — delingen habarlamada.
Sondaı-aq, otyrysta Abaı, Ulytaý jáne Atyraý oblystarynyń ekologııa departamentteriniń anyqtalǵan buzýshylyqtardy joıý jáne qoqys polıgondaryn joıý boıynsha qabyldanyp jatqan sharalar týraly esepteri tyńdaldy.
Kezdesý qorytyndysy boıynsha mınıstr aýmaqtyq departamentterge zańsyz qoqys polıgondaryn jedel joıý boıynsha jumysty kúsheıtýdi, monıtorıngti kúsheıtýdi, vedomstvoaralyq yntymaqtastyqty arttyrýdy jáne jańa qaldyqtardy ornalastyrý oryndarynyń qurylýyna jol bermeý úshin aldyn alý sharalaryn qabyldaýdy tapsyrdy.
Budan buryn Jetisý oblysynda janýar qaldyqtary tabylǵan qaýipti qoqys polıgony anyqtalǵanyn jazdyq.
