Qazaqstan Bolgarııany strategııalyq mańyzy bar seriktes retinde qabyldaıdy
ASTANA. KAZINFORM – Bolgarııa – Qazaqstannyń Ońtústik-Shyǵys Eýropadaǵy mańyzdy ári senimdi seriktesi. Bul týraly Aqordada Bolgarııa Prezıdenti Rýmen Radevpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
- Eń aldymen meniń shaqyrýymdy qabyl alyp, Qazaqstanǵa alǵash ret resmı saparmen kelgeni úshin Prezıdent Rýmen Radev myrzaǵa shynaıy rızashylyǵymdy bildiremin. Qonaqjaı qazaq eline qosh keldińizder. Bul kezdesý eki eldiń yntymaqtastyǵyna tyń serpin beredi dep senemin. Bolgarııa Qazaqstannyń Ońtústik-Shyǵys Eýropadaǵy mańyzdy ári senimdi seriktesi. Bizdiń yqpaldastyǵymyz myzǵymas dostyq pen túsinistikke negizdelgen. Jalpy, Qazaqstan Bolgarııany strategııalyq mańyzy bar seriktes retinde qabyldaıdy jáne Sizdiń memleketińizben qarym-qatynasty odan ary damytýǵa úlken mán berýde, - dedi Memleket basshysy.
Osy oraıda Prezıdent Qazaqstan men Bolgarııa arasynda dıplomatııalyq qatynas ornaǵanyna ótken aptada 33 jyl tolǵanyn eske saldy.
- Sizdiń saparyńyz osy mereıli mejege tuspa-tus kelip otyr. Osy ýaqyt ishinde bizdiń elderimiz barlyq deńgeıde ózara senim rýhyndaǵy saıası dıalog ornatty. Naqty sharttyq-quqyqtyq negiz qalyptasty. Eki eldiń saýda-ekonomıkalyq jáne ınvestıtsııalyq baılanystary nyǵaıa tústi. Elimizde tatý-tátti ómir súrip jatqan túrli etnostar qataryna bolgar ultynyń ókilderi de bar. Osy erekshe baılanys halyqtarymyz arasyndaǵy yntymaqtastyqty arttyra túsedi. Qos memlekettiń halyqaralyq uıymdar aıasyndaǵy yqpaldastyǵy da keńeıip keledi. Jan-jaqty ári senimdi seriktestigimizdi aldaǵy ýaqytta da bekite túsemiz, - dedi Qasym-Jomart Toqaev.
Buǵan deıin Memleket basshysy Qasym-Jomart Toqaev Aqordada elimizge resmı saparmen kelgen Bolgarııa Prezıdenti Rýmen Radevti qarsy alǵanyn jazǵan edik.
Keńeıtilgen quramdaǵy kelissóz barysynda Memleket basshysy Qasym-Jomart Toqaev Bolgarııa men Qazaqstan arasynda iskerlik keńesi qurylatynyn aıtty.