Qazaqstan Bolgarııamen aradaǵy qylmystyq sala boıynsha sońǵy kelisimdi júzege asyrmaq
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasy men Bolgarııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» zań jobasy maquldandy, dep habarlaıdy QazAqparat tilshisi.
«Bul Bolgarııamen aradaǵy qylmystyq sala boıynsha sońǵy kelisim. Buǵan deıingi adamdardy ustap berý jáne qylmystyq ister turǵysynda quqyqtyq kómek týraly sharttarǵa ratıfıkatsııa jasaldy. Shart sottalǵan adamdardy óz eline jazasyn óteý úshin berý jáne olarmen almasý tártibin retteıdi», - dedi QR Bas prokýrorynyń orynbasary Marat Ahmetjanov.
Qujattyń talaptaryna toqtalsaq, sottalǵandardy berý úshin bul adam eki eldiń biriniń azamaty bolýy tıis, sondaı-aq eki elde de qylmys bolyp sanalatyn áreket úshin sottalǵan bolýy kerek.
«Suraý alynǵan kezden úkim zańdy kúshine engen bolýy tıis jáne keminde 6 aı óteıtin ýaqyty qalýy kerek. Sotalǵan adamnyń jazbasha kelisimi bolýy tıis. Osy talaptar saqtalmasa, adam berilmeıdi. Jalpy, eki el arasynda qarym-qatynas jaqsy damyp keledi», - dedi M. Ahmetjanov.
Aıta keteıik, mundaı sharttar 21 elmen jasalǵan.
