Qazaqstan Bolgarııaǵa ýran jetkizedi

ASTANA. KAZINFORM — Qazaqstan Bolgarııaǵa ýran jetkizýdi josparlap otyr. Bul týraly búgin Aqordada «Samuryq-Qazyna» AQ basshysy Nurlan Jaqypov aıtty.

— Bolgarııada eki bloktan turatyn atom elektr stansasy bar. Ár blogynyń qýaty 1,2 megavatty quraıdy. Ýranymyzdy bolgar AES-ine jetkizý boıynsha yntymaqtastyq úshin áleýetti alań bar, — dedi ol BAQ ókilderine bergen suhbatynda. 

Aıta keteıik, búgin Aqordada Memleket basshysy Qasym-Jomart Toqaev elimizge resmı saparmen kelgen Bolgarııa Prezıdenti Rýmen Radevpen shaǵyn jáne keńeıtilgen quramda kelissóz júrgizdi. 

Kelissózder qorytyndysynda birqatar kelisimge qol qoıylyp, Prezıdentter BAQ ókilderiniń aldynda sóz sóıledi. Sóz sóıleý barysynda Qasym-Jomart Toqaev Transkaspıı halyqaralyq kólik dálizine Bolgarııanyń Býrgas jáne Varna teńiz porttaryn qosý máselesi qarastyrylǵanyn, Qazaq-bolgar bıznes forýmy ótip, onda birqatar kommertsııalyq qujat rásimdeletinin aıtty. 

Al Rýmen Radev Qazaqstannyń ǵarysh salasyndaǵy jetistikterin kórip tańǵalǵanyn atap ótti.