Qazaqstan bolashaqta Ortalyq Azııa aımaǵynda «halaldyń haby» bola alady - Djamal Bıdın
ASTANA. QazAqparat - Qazaqstan Respýblıkasynyń Malaızııadaǵy Elshisi Danııar Sarekenov 3 qarashada malaızııalyq halal ındýstrııanyń damytý Korporatsııasynyń (HDC) Bas atqarýshy dırektory Djamal Bıdınmen kezdesti, dep habarlaıdy QR SІM baspasóz qyzmeti.
Áńgime barysynda Djamal Bıdın Malaızııa halal ındýstrııasy, ekonomıkalyq órleýdegi jetekshi komponentterdiń biri ekendigin ataı kele, ınvestıtsııa úshin eń tartymdy bolyp qala beretindigin jáne eldiń syrtqy saýda kólemin arttyryp otyrǵandyǵyn jetkizdi. 2016 jyly halal ónimderdiń eksportynyń kólemi shamamen 12,5mlrd. AQSh dollary bolady, al ónerkásip úlesi Malaızııada JІÓ-niń 7,5%-yna quraıdy dep kútilýde. Ekonomıkanyń osy segmentin damytý ótken jyly eldegi shamamen qosymsha 100 000 jańa jumys oryndaryn qurýǵa múmkindik berdi.
2015 jyly, álemde halal ónimderdi tutynýdyń jalpy kólemi aldyńǵy jylmen salystyrǵanda 9,5%-ǵa ósti jáne shamamen 2 trln. AQSh dollaryn quraǵan. Sonymen birge farmatsevtıkalyq jáne kosmetıkalyq, sondaı-aq jeke kútimge arnalǵan halal standartty ónimderdi tutynýdyń álemdik kórsetkishi de artqan. Atalmysh sektordyń ortasha jyldyq ósimi aldaǵy jyldary 10,8%-ǵa jetedi dep boljanýda, al jalpy kólem 2019 jyldary 3,7 trln AQSh dollaryna jetedi.
Qazaqstannyń osy atalǵan ındýstrııanyń damýyna aıtarlyqtaı áleýeti bar ekeni atap etildi. Djamal Bıdın Qazaqstan bolashaqta Ortalyq Azııa aımaǵynyń «halaldyń haby» bola alatynyn atap ótti. Onyń pikirinshe, ekonomıkanyń kóptegen sektorlaryn qamtıtyn tıisti memlekettik «ekojúıeni» qalyptastyrý barysynda júıeli tásilderdi qoldaný osy baǵytty tabysty damytýǵa negiz qalaıdy.
Kezdesýdiń qorytyndysy boıynsha, Halal ındýstrııany damytý korporatsııasynyń delegatsııasyn Astanaǵa jiberý týraly kelisimge, sondaı-aq Qazaqstanda osy baǵytty damytý Jol kartasyn jasap shyǵarý barysynda QR-diń memlekettik organdaryna kómek kórsetýine qol jetkizildi.
