Qazaqstan «Bolashaq» stıpendıattaryna qansha qarajat jumsap jatyr

ASTANA. KAZINFORM – «Halyqaralyq baǵdarlamalar ortalyǵy» AQ «Bolashaq» baǵdarlamasy stıpendıattaryn oqytýǵa bólingen bıýdjet qarajatynyń somasyn atady.

Ortalyq málimetine qaraǵanda, oqytý quny bilim baǵdarlamasyna, baratyn elge jáne tańdalǵan mamandyqqa baılanysty ózgerip turady. Sonymen qatar, qarjyny esepteý kezinde ýnıversıtettiń reıtıngi, onyń ornalasqan jeri, baǵdarlamanyń uzaqtyǵy da mańyzdy ról atqarady. 

«Orta eseppen bir stıpendıatqa magıstratýra baǵytynda shamamen 10-15 mln teńge jáne doktorantýraǵa 20-25 mln teńge jumsalady. Onyń ishinde oqý aqysy, shákirtaqy, áýe kóligimen saparlaý aqysy jáne basqa da soǵan baılanysty shyǵyndar qamtylǵan», - delingen ortalyqtyń Kazinform agenttigine bergen jaýabynda. 

Aıta keteıik, «Bolashaq» halyqaralyq stıpendııasy 1993 jyly 5 qarashada qurylyp, bir jyldan keıin alǵashqy qazaqstandyq stýdentter oqýǵa bardy. 30 jyl ishinde 12 731 adam dıplom aldy, ıaǵnı orta eseppen jylyna 425 adam oqýyn támamdap turdy. Keıingi birneshe jylda 2607 adam oqýyn aıaqtady.

Qazirgi kezde «Bolashaq» baǵdarlamasy boıynsha 939 qazaqstandyq bilim alyp jatyr. Olardyń basym bóligi magıstratýrada – 704 adam. Al doktorantýrada 133 bolsa, taǵy 102 adam taǵylymdamadan ótýge bardy. 

Budan buryn habarlanǵandaı, qyrkúıek aıynyń basynda shetelde kadrlar daıarlaý jónindegi respýblıkalyq komıssııanyń sheshimimen 150 qazaqstandyq «Bolashaq» halyqaralyq stıpendııasynyń ıeger atandy.