Qazaqstan boksshylarynyń Azıadada jeńiske jetetinine senimdimin - Roı Djons
Jalpy, Roı Djons ulttyq qurama bazasyna kútpegen jerden keldi. Ol Qostanaı oblysyna bir sporttyq is-sharaǵa shaqyrylǵan bolatyn. Biraq ulttyq boks quramasy Astanada Azıada aldyndaǵy sońǵy daıyndyq jumystaryn pysyqtap jatqanyn estigen soń Roı Djons bizdiń boksshylarmen kezdeskisi keldi.
Ataqty sportshy komandanyń qandaı jaǵdaıda jattyǵyp jáne demalyp jatqanyn óz kózimen kórdi. Qurama komandanyń bas jattyqtyrýshysy Myrzaǵalı Aıtjanovpen jáne sportshylarmen sóılesip, olarǵa Azııa oıyndarynda sáttilik tiledi.
«Bilem, qazir jarys baǵdarlamasy ózgergen. Sizder medal alamyz dep úmit artqan birneshe salmaq dárejesi alynyp tastaldy. Biraq soǵan qaramastan, sizder birneshe altyn alasyzdar degen senimdemin. Men qazaqstandyq bokstyń tarıhyn jaqsy bilemin. Ol álemde jetekshi oryndardyń birin ıelenip úlgerdi. Qazaqstandyqtar áýesqoı boksta da, kásipqoı boksta da ózderiniń basymdyǵyn talaı ret dáleldegen. Sondyqtan, búginde sizder - óte myqty komandasyzdar. Men sizderdiń jeńispen oralatyndaryńyzǵa senemin»,-dedi Roı Djons.
