Qazaqstan boksshylary «Taıland Oýpen» týrnırine qatysady
«Osy jyldyń sáýir aıynda «Taıland Oýpen« mańyzdy halyqaralyq týrnırine bokstan Qazaqstan Respýblıkasynyń erler quramasy qatysady. Bul da óz kezeginde 2022 jylǵy Azııa oıyndaryna daıyndyq aldynda tamasha tájirıbe sanalady. Erler qurama komandasynyń jattyqtyrýshylar keńesi jas sportshylardyń áleýetin jaqsartý men tájirıbe almasý úshin mańyzdy týrnırlerge ulttyq qurama komandanyń qatysýy boıynsha kúntizbelik jospar ázirledi. Bul 2024 jylǵy Olımpıadaǵa daıyndyqqa birtindep jaqyndaýǵa múmkindik beredi», - dedi ol Mádenıet jáne sport mınıstrliginiń keńeıtilgen alqa otyrysynda.
Onyń atap ótýinshe, elimizdiń bokstan qyzdar quramasy Álem chempıonatynan keıin Qytaıdyń klımattyq jaǵdaıyna barynsha jaqyn Almaty oblysynyń eń tómengi taý bıiktiginde jattyǵýlar ótkizýdi josparlap otyr. Odan keıin komanda Qytaıǵa, Úrimshi qalasyna eýropalyq komandalarmen birlesken oqý-jattyǵý jıyndaryna qatysady.
«Osy jyldyń maýsym aıynda eki qurama komandanyń jattyqtyrýshylar quramy úshin biliktilikti arttyrý semınary josparlanǵan. Bul sportshylardyń aldaǵy halyqaralyq is-sharalarǵa daıyndyq sapasyn arttyrýǵa múmkindik beredi»,- dedi Maratbek Myqtybekov.
