Qazaqstan boksshylary Azııa oıyndarynda basty qarsylastaryn atady

Bıylǵy Azııa oıyndary 19 qyrkúıek pen 4 qazan aralyǵynda Japonııanyń Aıtı prefektýrasy men Nagoıa qalasynda ótip jatyr. Qazaqstandyq boksshylar dodaǵa 5 áıelder jáne 6 erler salmaǵynda qatysady.

Qazaqstan boks federatsııasynyń atqarýshy dırektory Raýan Igenevtiń aıtýynsha, ulttyq qurama Azııa oıyndaryna jyl boıy josparly daıyndyq júrgizip kelgen.

— Qos ulttyq qurama jyl boıy jıyrmadan astam oqý-jattyǵý jıynyn ótkizip, kóptegen halyqaralyq týrnırge qatysty. Azııa oıyndarynyń aldynda Japonııada da oqý-jattyǵý jıynyn jasap kettik. Qyzdar tórt quramamen, jigitter eki quramamen keldi. Qazir basty maqsat — sharshy alańǵa shyǵyp, jeńiske jetý, — dedi Raýan Igenev Jibek Joly telearnasyndaǵy «Búgin.LIVE» baǵdarlamasynda.

Federatsııa ókiliniń aıtýynsha, qurama sapyna sportshylar jyl boıyndaǵy jarystardaǵy nátıjesine qaraı iriktelgen. Boksshylardyń arasynda bıylǵy Azııa jáne álem chempıonattaryna qatysqandar bar. Sondyqtan qarsylastardyń basym bóligimen buryn kezdesken sportshylar da bar.

— Báseke ońaı bolmaıdy. Qyzdar arasynda Qytaı, Qytaı Taıbeıi, Úndistan jáne Ózbekstan quramalary myqty. Erler arasynda Ózbekstan negizgi qarsylastardyń biri. Sonymen qatar Qytaı, Taıland, Mońǵolııa jáne Japonııa quramalarynda da myqty boksshylar bar. Durys taktıka jáne psıhologııalyq turǵydan daıyndyq bolsa, jaqsy nátıje kórsetemiz degen oıdamyz, — dedi ol.

Qazaqstan quramasyna Azııa oıyndarynda úsh altyn medal alý maqsaty qoıylǵan. Alaıda federatsııa ókili bul kórsetkishti sońǵy meje dep sanamaıtynyn atap ótti.

— Mınıstrlikpen birge medaldar boıynsha maqsattar belgilenip, úsh altynǵa qol qoıyldy. Biraq maqsatymyz tek úsh altyn emes, odan da kóp. Bul biz úshin mańyzdy jarystardyń biri. Eki tsıkl boıy altyn bolmady. Sondyqtan Azııa oıyndarynda jaqsy nátıje kórsetýge tyrysamyz, — dedi Raýan Igenev.

Aıta keteıik, buǵan deıin Qazaqstan erler quramasy tasjoldaǵy velojarysta eki júlde jeńip alǵanyn jazǵan edik.