Qazaqstan boks quramasy Ispanııadaǵy týrnırdi alty altyn medalmen aıaqtady

ASTANA. KAZINFORM — Qazaqstan boks quramasy Ispanııanyń La-Nýsııa qalasynda ótken Boxam Elite-2026 týrnıri máresine jetti.

Bul týrnırdiń fınalynda el quramasynan 11 boksshy altyn medaldy sarapqa saldy.

Halyqaralyq týrnırde Sanjar Tashkenbaı (50 keli), Mahmud Sabyrhan (55 keli), Tórehan Sabyrhan (70 keli), Nurbek Oralbaı (85 keli), Aıbek Oralbaı (90 keliden joǵary), Ýmıda Sadyqova (80 keliden joǵary) chempıon atansa, Nurzat Ońǵarov (50 keli), Aman Qonysbekov (75 keli), Saǵyndyq Toǵambaı (90 keli), Nazerke Serik (65 keli) pen Panar Seıithanqyzy (80 keliden joǵary) kúmis júldeger atandy.

Elimizdiń erler quramasy úshin halyqaralyq týrnır — Nurjan Nasanovtyń jetekshiligimen ótip jatqan alǵashqy jarys. Ol jyl basynda Qaırat Sátjanovty almastyrǵan edi.

Bas bapker budan buryn Boxam Elite halyqaralyq týrnıriniń mańyzy jóninde aıtyp bergen bolatyn. 

— Jyldyń basy bolǵandyqtan, boksshylar biraz ýaqyt sharshy alańǵa shyqpaı qaldy. Sondyqtan bizge qazir jarys tájirıbesi asa qajet, — dedi Nurjan Nasanov.

Aldaǵy ýaqytta ulttyq qurama taǵy eki qurammen Bolgarııadaǵy Strandja týrnırinde baq synaıdy. 

Sondaı-aq qazaqstandyq bylǵary qolǵap sheberlerin 28 naýryz-1 sáýir aralyǵynda Mońǵolııada World Boxing uıymynyń eresekter arasyndaǵy alǵashqy qurlyqtyq birinshiligi kútip tur.

Al 19 qyrkúıek-4 qazan aralyǵynda olar Japonııada ótetin Azıadaǵa qatysýdy josparlap otyr.