Qazaqstan boks quramasy halyqaralyq oqý-jattyǵý jıynyna attandy
ASTANA. KAZINFORM — Qazaqstannyń ulttyq boks quramasy Kalıfornııa shtatynyń Los-Andjeles qalasyna jetip, 2026 jylǵy Azııa oıyndaryna daıyndyq sheńberinde kezekti oqý-jattyǵý jıynyn bastaıdy. Bul týraly Sports.kz saıty jazdy.
Boksshy Sanjar Táshkenbaı Instagram paraqshasynda Los-Andjeles áýejaıynan jáne ushaq bortynan ulttyq quramanyń músheleri — Aıbek jáne Nurbek Oralbaı baýyrlarymen túsken sýretterin jarııalady. Sondaı-aq sportshylardyń Los-Andjelestiń halyqaralyq áýejaıy (LAX) termınalynda túskeni de kórinis tapqan.
Buǵan deıin AQSh-qa ulttyq quramanyń áıelder komandasy da bas bapker Eldos Saıdalınniń jetekshiligimen barǵan bolatyn. Eki qurama Kalıfornııadaǵy UCLA kampýsynda ornalasyp, bir aı boıy daıyndyq júrgizedi.
Boks týrnıri XX jazǵy Azııa oıyndary aıasynda Japonııanyń Nagoıa qalasy men Aıtı prefektýrasynda 19 qyrkúıek pen 4 qazan aralyǵynda ótedi. Bul jarys 2026 jyly Qazaqstan boksshylary úshin basty doda bolmaq. Azııa oıyndaryna daıyndyqtyń sońǵy kezeńi Japonııada ótetin oqý-jattyǵý jıyny bolady.
Aıta keteıik, Qazaqstan quramasy buǵan deıin Qytaıdyń Gýııan qalasynda ótken Álem kýbogynyń ekinshi kezeńin 5 altyn jáne 3 qola medalmen aıaqtaǵan bolatyn.
