Qazaqstan boks federatsııasynyń vıtse-prezıdenti Asian boxing uıymynyń basshylyq quramyna endi

ASTANA. KAZINFORM — Bangkok (Taıland) qalasynda bokstan U19 jáne U22 jasqa deıingiler arasyndaǵy Azııa chempıonaty aıasynda Azııa boks federatsııasynyń kezekten tys kongresi ótti. Bul týraly UOK málim etti.

Jıyn barysynda jańa qurlyqtyq uıymnyń basshylyq quramy saılandy. Qazaqstan boks federatsııasynyń vıtse-prezıdenti Darhan Qyzaıbaev Qarjylyq jáne aýdıtorlyq komıssııanyń tóraǵasy ári dırektorlar keńesiniń múshesi bolyp taǵaıyndaldy.

Aıta keteıik, Darhan Qyzaıbaev 2024 jyldyń aqpan aıynan bastap halyqaralyq baılanystar jónindegi vıtse-prezıdent qyzmetin atqaryp keledi. Sondaı-aq, ol 2024 jyldyń jeltoqsanynda Asian Boxing ýaqytsha keńesiniń quramyna saılanǵan edi. 

Aıta keteıik, atalǵan World Boxing aıasynda ótip jatqan Azııa chempıonatyn Qazaqstandyq jas boksshylar sátti bastady. 19 ben 22 jasqa deıingiler arasynda 2025 jylǵy Azııa chempıonatynyń alǵashqy jarys kúninde qazaqstandyq segiz boksshy synǵa tústi.