Qazaqstan boks federatsııasy World Boxing quramyna endi
ASTANA. KAZINFORM – Qazaqstannyń boks federatsııasy resmı túrde World Boxing-tiń tolyqqandy múshesi atandy. QR Ulttyq olımpıadalyq komıtetiniń málimetinshe, bul týraly AQSh-tyń Kolorado-Sprıngs qalasynda ótken World Boxing halyqaralyq boks federatsııasynyń Kongresinde habarlandy.
Búginde World Boxing (WB) uıymyna 55 kirip otyr.
Kongress barysynda HOK maquldaǵan WB Jarǵysyna engizilgen ózgerister týraly pikirtalas boldy. Sonymen qatar, jarys ótkizý reglamentine de engizilgen ózgerister qabyldandy. Atap aıtqanda, týrnırler jańa salmaq dárejelerinde ótkiziletin bolady. Sondaı-aq, tóreshilerdiń jekpe-jek barysyndaǵy jáne jeńimpazdardy anyqtaý kezindegi jumysyna da ózgerister engizildi.
Sondaı-aq, World Boxing Olımpıadalyq komıssııasynyń tóraǵasy Gennadıı Golovkın Kongress qatysýshylary aldynda sóz alyp, U19 jasóspirimder arasyndaǵy alǵashqy álem chempıonatyn jáne Kongresti uıymdastyrǵany úshin US Boxing uıymyna alǵys bildirdi.
Óz sózinde ol Portýgalııada ótken Ulttyq Olımpıada komıtetteri qaýymdastyǵynyń (UOKQ) Bas Assambleıasynda ártúrli elderdiń Ulttyq Olımpıada komıtetteri jáne Olımpıada qozǵalysynyń ózge de sporttyq uıymdarymen kezdesýler ótkizgen World Boxing Olımpıadalyq komıssııasynyń jetistikterin atap ótti.
Kongress barysynda Qazaqstannyń boks federatsııasy Los-Andjelestegi Olımpıada oıyndaryna irikteý týrnıri retinde 2027 jylǵy boks boıynsha álem chempıonatyn ótkizýge ótinim berdi. Álemdik uıymnyń sheshimi jaqyn arada belgili bolady.
Aıta keteıik, World Boxing halyqaralyq boks federatsııasy 2023 jyldyń sáýir aıynda qurylǵan.
Buǵan deıin Chernogorııanyń Býdva qalasynda ótken jastar arasyndaǵy 2024 jylǵy álem chempıonatynda qazaqstandyq boksshylar 17 medal alǵanyn jazǵan bolatynbyz.
