Qazaqstan boks federatsııasy Myrzaǵalı Aıtjanovqa qurmet kórsetti
ASTANA. KAZINFORM - Qazaqstan boks federatsııasy QR Eńbek sińirgen jattyqtyrýshy, Qazaqstan ulttyq quramasynyń bas bapkeri retinde kóptegen jarystarda júlde salǵan Myrzaǵalı Aıtjanovqa qurmet kórsetti.
QR Boks federatsııasy atap ótkendeı, tanymal bapkerge qazaqtyń dástúri boıynsha, Myrzaǵalı Aıtjanovtyń ıyǵyna shapan jaýylyp, baǵaly syılyqtar tabystaldy.
«Myrzaǵalı Qulanulynyń Qazaqstan boksyna sińirgen eńbegi zor. Búgingi kúnge deıin bylǵary qolǵap sheberlerin daıyndaýda tókken mańdaı terdi baǵalaımyz jáne sizge alǵys aıtamyz», - dedi is-sharada Qazaqstan boks federatsııasynyń prezıdenti Shahmurat Mútálip.
Esterińizge sala keteıik, Qazaqstan Boks federatsııasy Parıj Olımpıadasynan keıin qorytyndy keńes ótkizip, nátıjesinde uıym bokstan erler komandasynyń bapkerlik quramy tolyǵymen jumystan shettetilgenin atap ótken bolatyn.
Olardyń qatarynda bas jattyqtyrýshy Myrzaǵalı Aıtjanov jáne bapkerlik quramdaǵy 10 maman, QBF vıtse-prezıdenti Azız Qojambetov qyzmetten bosatylǵan edi.
