Qazaqstan boks federatsııasy kýbogy fınalyna shyqqan quramalar anyqtaldy

ASTANA. KAZINFORM — Qazaqstan boks federatsııasy kýbogy fınalyna shyqqan quramalar belgili boldy.

Búgin, 13 jeltoqsanda Astana qalasynda Qazaqstan boks federatsııasy kýbogynyń jartylaı fınaly ótti. 

Alǵashqy jartylaı fınalda Qaraǵandy oblysy men Shymkent qalasynyń bylǵary qolǵap sheberleri kúsh synasty. Bul joly shymkenttik sportshylar shıraq qımyldaı bildi. Nátıjesinde qarsylasynan 9:6 esebimen basym túsip, fınalǵa berilgen joldamany qaltaǵa basty. 

Taǵy bir jartylaı fınalda Mańǵystaý oblysy men Astana qalasy boksshylarynyń joly túıisti. Qarsylastar tartysty jekpe-jek ótkizdi. Mańǵystaýlyq boksshylar 8:7 esebimen jeńip, endi altyn medaldy sarapqa salýǵa múmkindik aldy. 

Shymkenttik sportshylar shırek fınalda A tobynda 22-28 qyrkúıek aralyǵynda Túrkistan, Almaty, Jambyl oblystary, Almaty qalalarynyń boksshylarymen synǵa túsip, úzdik kóringen edi.

Al astanalyq boksshylar 29 qyrkúıek pen 5 qazan aralyǵynda V tobynda Soltústik Qazaqstan, Pavlodar, Qostanaı, Aqmola oblystary quramalaryn artqa qaldyrdy.

Endi 14 jeltoqsanda birinshi jáne úshinshi oryndar úshin fınaldyq jekpe-jekter ótedi.

Ulttyq olımpıadalyq komıtettiń málimetinshe, júlde qory 150 000 AQSh dollaryn quraıtyn joba aımaqtarda boksty damytýǵa baǵyttalǵan.